BUU Ázerbaıjannyń kemsitýmen kúresi týraly aıtty

ASTANA. KAZINFORM — Ázerbaıjan Konstıtýtsııasy kemsitýshiliktiń barlyq túrine qatań túrde tyıym salady jáne barlyq adamdarǵa teń quqyqtar men bostandyqtardy qamtamasyz etedi. Bul týraly BUU janyndaǵy Ázerbaıjannyń Turaqty ókildiginiń birinshi hatshysy Shahrııar Gadjıev aıtty, dep jazdy Report.

Ol muny BUU Bas Assambleıasynyń 80-sessııasynyń úshinshi komıtetiniń otyrysynda násilshildiktiń zamanaýı túrleri boıynsha arnaıy baıandamashymen ınteraktıvti dıalog barysynda málimdedi.

Shahrııar Gadjıev mádenı kóptúrlilikti ilgeriletý jáne qorǵaý, sondaı-aq ártúrli mádenıetter arasyndaǵy ózara túsinistik pen baılanys ornatý baǵytyndaǵy kúsh-jiger násilshildikke, násildik kemsitýshilikke, ksenofobııaǵa jáne olarǵa baılanysty tózimsizdikke qarsy kúreste mańyzdy ról atqara alatynyn aıtty.

Dıplomat memleketter násildik kemsitýshilikti nasıhattaıtyn jáne oǵan arandatatyn uıymdardy ashyq túrde aıyptap, tyıym salýy tıis ekenin atap ótti.

— Ázerbaıjan óz aýmaǵynda turatyn barlyq adamdardyń násiline, terisiniń túsine, shyǵý tegine, ulttyq nemese etnıkalyq tıesiligine qaramastan olardyń quqyqtary men qadir-qasıetin qorǵaýǵa beıimdi jáne násildik kemsitýshiliktiń barlyq túri men kórinisterin joıýǵa baǵyttalǵan ulttyq jáne jahandyq deńgeıdegi kúsh-jigerin jalǵastyra beredi, — dedi Sh. Gadjıev.

Aıta keteıik, Memleket basshysy Qasym-Jomart Toqaev elimizde adamdy ultyna, tiline, dinine qaraı kemsitý eshqashan bolmaǵanyn aıtty.