Búrkitshi qyz Aısholpan qusbegilikten QR chempıonatyna qatysady
ASTANA. KAZINFORM – Shyǵys Qazaqstan oblysy Óskemen qalasynda 2024 jylǵa arnalǵan qusbegilikten eresekter arasynda bastalǵan XVII QR chempıonatyna álemge tanylǵan áıgili búrkitshi qyz Aısholpan Nurǵaıypqyzy da qatysady.
QR Ulttyq sport túrleri federatsııasy málim etkendeı, saıypqyran baptaǵan saıatshylar men qusbegilikke qyzyǵatyn qaýym úshin XVII QR chempıonaty óte tartysty ótpek.
8 aqpanda bastaý alǵan qusbegiler arasyndaǵy el birinshiligi 12 aqpanǵa deıin jalǵaspaq.
Atalǵan birinshilikke ıtelgi, búrkit, qarshyǵa qustary qatysady. Jeńimpazdar arnaıy kýbok, dıplom, medaldarmen jáne túrli qarjylaı syılyqtarmen marapattalady.
Aıtýly dodada talaı birinshilikte top jarǵandar ózara baq synasady.
Aıta keteıik, bul qusbegiler saıysynda bar álemdi tánti etken búrkitshi qyz Aısholpan Nurǵaıypqyzy da óz ónerin ortaǵa salmaq. Birinshiliktiń basty maqsattarynyń biri – ǵasyrlardan beri jalǵasyp kele jatqan ata dástúrdi umytpaı, jańǵyrtyp, jańa qyrynan kórsetý.
Esterińizge sala keteıik, osyǵan deıin álemge áıgili búrkitshi, qandasymyz Aısholpannyń otbasy Monǵolııa elinen bir jola ata-jurty Qazaqstanǵa qonys aýdaryp, kóship kelgenin jazǵan bolatynbyz.
