Búrkitshi qazaq qyzy týraly fılm mońǵol kórermenderine jol tartty

ASTANA. QazAqparat - Qazaq ultynyń saıatshylyq ónerin álemge tanytýǵa óz úlesin qosqan Mońǵolııadaǵy qandasymyz  Aısholpan Nurǵaıypqyzynyń  qyzyqty ómiri jaıly "The Eagle Huntress" derekti fılminiń mońǵol eliniń astanasy Ulanbatyrda resmı tanystyrylymy boldy, dep habarlaıdy QazAqparat  tilshisi ulgiinews.mn  saıtyna silteme jasap.

Shetelde jaryq kórgenine biraz ýaqyt ótken "The Eagle Huntress" derekti fılminiń  Mońǵolııadaǵy resmı tanystyrylymy aıyryqsha saltanatpen ótti.

«Búrkitshi qyz týraly fılm álemdik deńgeıde qurmetke bólenip úlgerse de elimizdiń azamattaryna tamashalaýdyń sáti jańa túskendeı. Búrkitshi qyzdyń ertegideı ómirinen syr shertetin atalmysh týyndyny elimiz kórermenderine usyný úshin resmı ruqsatty  MUH múshesi L.Bold basqaratyn "Jańa Mońǵol bastamasy" beıresmı uıymy iske asyrǵan», - dep jazady atalǵan aqparat portaly. 

 

Fılmniń  Ulanbatyrdaǵy bul ashylý saltanatyna Aısholpannyń ákesi Nurǵaıyp, sondaı-aq "Búrkitshi qyz" kınosyn jaryqqa shyǵarýǵa aıtarlyqtaı úles qosqan  Mádenıet, sport, týrızm mınıstrliginiń eks-basshysy  Ts.Oıýýngerel qatysty. 

Sharaǵa qatysýshy MUH múshesi L.Bold: "Elimizdi ǵalamǵa jarnamalaýshy "Búrkitshi qyz" fılmi ár mońǵol azamaty tamsanyp tamashalaıtyn fılmderdiń biri bolmaq", - deıdi.

 

Al mońǵol eliniń  burynǵy Mádenıet, sport, týrızım mınıstri: «Sizder men bizder fılmdi kórýge   qol jetkizip otyrmyz. Bul fılm ǵalamdy tamsantyp, ondaǵan kıno festıvalderine qatysyp, marapataldy. Búrkitshi qyz Aısholpan da eńbeginiń jemisin kórip, kınodan túsetin tabystan  óz úlesin almaq. Tipten ol keıinde osy taqyryp aıasynda jasalatyn mýltfılmder men baspa arqyly shyǵatyn árbir týyndydan  úles alyp otyrady», - degen jaǵymdy jańalyǵyn  fılm kórermenderimen bólisti. 

 

Qyzyn jas kúninen ulttyq ónerimizge tárbıelep, talaptanǵan jasóspirimdi maqsatyna jetkizgen búrkitshi qyzdyń ákesi - Nurǵaıyp bala tárbıesinde bastapqy qadamnyń mańyzdy bolatynyn aıtty.

 

«Ár balanyń armany bolady. Al soǵan jetý úshin bastapqy qadam mańyzdy bolmaq. Men búldirshinimniń armanyna qulaq asyp, oǵan jetetin alǵashqy qadamyna qoldaý kórsetken ákemin.  Balanyń armanyna  qulaq asyp, talabyn ushtap, ıaǵnı «betinen qaqpaı, belin býsa» qandaı tańǵajaıyp jetistikke jetetinin qyzym arqyly kóz jetkizip, keýdemdi shattyq kerneýde. Ár ata-anaǵa balalaryńyzdyń armanyna mán berińizder dep aıtqym keledi", -  dedi fılmniń ashylý rásiminde Aısholpannyń ákesi Nurǵaıyp.

Qaısar qazaq qyzynyń qaǵylezdigi men súıkimdi qylyqtary, sondaı-aq tańǵajaıyp dala tabıǵaty beınelengen derekti kıno ulanbatyrlyq kórermenderdi birinshi kórilimde-aq tánti etti.