Burynǵy qorǵanys mınıstri Japonııanyń jańa premer-mınıstri bolady

ASTANA.KAZINFORM — Japonııanyń lıberaldy-demokratııalyq partııasy (LDP) jańa kóshbasshy saılady. Bul japon saıasatynyń ardageri Sıgerý Isıba, ol sonymen birge Japonııanyń kelesi premer-mınıstri bolady, óıtkeni LDP parlamentte basym daýysqa ıe, dep jazady VVS.

Premer-mınıstr Fýmıo Kısıda ótken aıda qaıta saılaýǵa túspeıtinin jarııalaǵannan keıin toǵyz kandıdat partııa basshysy laýazymyna talasty.

LDP Japonııany soǵystan keıingi jyldarda uzaq basqardy. Partııa kóshbasshysyn aýystyrý qıyn boldy. Sebebi partııa ishi sońǵy ýaqytta janjaldar men ishki kıkiljińge toly boldy, bul partııa ishindegi birneshe yqpaldy fraktsııanyń taralýyna ákep soqty.

Qoǵamdyq saýalnamanyń kópshiliginde 63 jastaǵy Isıba kósh bastady. Bul onyń LDP-ny basqarýǵa jasaǵan besinshi áreketi jáne ol bul joly jeńilse, bolashaqta partııany basqarýǵa taǵy da umtylatynyn aıtty.

Isıbanyń lıberaldy kózqarasy partııalastary arasynda únemi qoldaý taba bermeıdi.

Máselen, ol áıelderdiń ımperator taǵyna otyrý múmkindigin jaqtaýymen tanymal. Bul — japon qoǵamy úshin óte názik ári daýly másele. Al LDP músheleriniń kópshiligi buǵan qarsy.

Isıba sondaı-aq burynǵy partııa jetekshisi jáne premer-mınıstr Fýmıo Kısıdany birneshe ret jáne kópshilik aldynda synǵa aldy, mundaı jaǵdaı japon saıasatynda kóp kezdese bermeıdi.

Isıbanyń ekinshi týrdaǵy qarsylasy Sanae Takaıtı, kerisinshe, partııanyń eń konservatıvti qanatyna jatady.