Burynǵy áıelin emhanada óltirgen atyraýlyq 15 jylǵa sottaldy
ATYRAÝ. KAZINFORM — Atyraý soty burynǵy áıelin emhanada pyshaqtap óltirgen kúdiktige sot úkimin shyǵardy. Kúdikti Jylyoı aýdanynda turǵan.
Atyraý oblysynyń qylmystyq ister jónindegi mamandandyrylǵan aýdanaralyq sotynda burynǵy áıelin óltirgen kúdikti S.-ǵa qatysty qylmystyq is qaraldy. Kúdiktige Qylmystyq kodeksiniń 99-babynyń 2-bóliginiń 9,15)-tarmaqtary boıynsha (Adam óltirý, ıaǵnı buzaqylyq nıetpen, tótenshe jaǵdaı kezinde basqa adamdy quqyqqa qarsy qasaqana qazaǵa ushyratý) aıyp taǵylǵan.
Sot materıalyna súıensek, 2025 jylǵy 27 naýryzda jábirlenýshi Q. óziniń Instagram áleýmettik jelisindegi paraqshasynda zańdy túrde ajyrasqan burynǵy jubaıy sottalýshy S.-men hat almasqan. Hat almasý kezinde sottalýshy S. men jábirlenýshi Q.-nyń arasynda ózara sózge kelispeýshilik týyndaǵan.
— Sol kezde S. jábirlenýshi Q.-ǵa ashýlanyp, mańyzy shamaly sebepti paıdalanyp, ony óltirý pıǵyly paıda bolǵan. Qylmystyq nıetin júzege asyrý úshin S. jınalmaly pyshaqty qaltasyna salyp, jábirlenýshiniń jumys ornyna kelip, onyń qyzmettik bólmesine kirgen. Qyzmettik bólmede Q.-nyń áriptesi bolǵan. S. soǵan qaramastan, oryndyqta otyrǵan jábirlenýshini basynan qolymen uryp-soqqan. Q.-nyń áriptesi olarǵa arasha túsken sátte, sottalýshy S. jınalmaly pyshaqty qaltasynan shyǵarǵan. Jábirlenýshi Q.-nyń áriptesi kómekke adamdardy shaqyrý úshin bólmeden qashyp shyqqan. Sol kezde S. pyshaqpen Q.-nyń moınynyń sol jaq joǵarǵy bóliginiń artqy tusyna bir ret, sol jaq kókirek qýysyna bir ret soqqy jasap, oqıǵa bolǵan jerden ketip qalǵan, — dep habarlady sottan.
S.-nyń áreketi saldarynan jábirlenýshi Q. aýyr dene jaraqatyn alǵan. Jábirlenýshi esin jımastan oqıǵa ornynda kóz jumǵan. Sottalýshy S.-nyń kinási sottalýshynyń, kýálardyń jaýaptarymen, saraptama qorytyndylarymen, oqıǵa bolǵan jerdi qaraý hattamasymen jáne zattaı dáleldemelermen dáleldengen.
Prokýror sottalýshyny taǵylǵan aıyp boıynsha kináli dep tanýdy, oǵan 15 jyl merzimge bas bostandyǵynan aıyrý jazasyn taǵaıyndaýdy usynǵan. Al jábirlenýshi tarap sottalýshyǵa ómir boıyna bas bostandyǵynan aıyrý jazasyn taǵaıyndaýdy surady.
Alaıda sottalýshy S. kinásin ishinara moıyndaǵan. Qorǵaý tarapy sottalýshynyń is-áreketin Qylmystyq kodeksiniń 99-babynyń 1-bóligi boıynsha (Adam óltirý) dárejeleýdi suraǵan.
Sottalýshynyń kinásin ishinara moıyndap, shyn nıetpen ókingenin jazany jeńildetetin mán-jaı retinde tanyldy. Jazany aýyrlatatyn mán-jaılar anyqtalmady.
— Sot úkimimen sottalýshy S. Qylmystyq kodeksiniń 99-babynyń 2-bóliginiń 9-tarmaǵymen kináli dep tanyldy. Oǵan 15 jyl merzimge bas bostandyǵynan aıyrý jazasy taǵaıyndaldy. Jábirlenýshi taraptyń paıdasyna moraldyq zalal óndirildi, — dep málim etti sottan.
Sot úkimi zańdy kúshine engen joq.
Eske sala ketelik, buǵan deıin Qulsaryda burynǵy áıelin jumys ornynda óltirgen kúdikti ustalǵanyn jazǵan edik.