Burymdy boksshylarymyzdyń beseýine de Olımpıadaǵa joldama buıyrmady
ASTANA. KAZINFORM - Italııanyń Býsto-Arsıtsıo qalasynda ótip jatqan lıtsenzııalyq týrnırde qazaqstandyq boksshy Alýa Balqybekova shırek fınalda súrindi.
Ol shırek fınalda germanııalyq Maksı Karına Kloetzerden aılasyn asyra almady. Qarsylasyna 2:3 esebimen jol berdi.
Esterińizge sala keteıik, Italııadaǵy lıtsenzııalyq týrnırge áıelder arasynda bes boksshymyz baq synady.
Ókinishke qaraı beseýi de joldamaǵa qol jetkize almady. Onyń ekeýi jarysty erte aıaqtasa, úsheýi shırek fınalda, joldmaǵa synyq súıem jetpeı jarysty aıaqtady.
Aıtalyq búgin áıelder arasynda shırek fınalda judyryqtasqan otandasymyz Valentına Halzova (75 keli) Ulybrıtanııa boksshysy Kındı Ngambamen Olımpıada joldamasyn sarapqa saldy.
Nátıjesinde otandasymyzdy 3 márte nokdaýnǵa túsirgen Ngamba otandasymyzdan Parıj Olımpıadasynyń joldamasyn julyp aldy.
Al osyǵan deıin 66 kelige deıingi salmaqta óner kórsetip júrgen Natalıa Bogdanova lıtsenzııalyq týrnırdiń 1/8 fınalynda polshalyq Aneta Rıgelsqa ese jiberip, jarysty aıaqtady.
60 kelide el namysyn qorǵaǵan taǵy bir burymdy boksshymyz Rımma Volosenko irikteý syndarynyń barlyǵynda qarsylastarynan basym túsip, shırek fınalda kútpegen jerden Slovakııa sportshysy Mıroslava Jedınakovaǵa tóreshiler sheshimimen ese jiberdi.
Burymdy boksshylarymyz arasynda jarysty eń erte aıaqtaǵan Jaına Shekerbekova boldy. 54 keli salmaqta synǵa túsken ol birinshi jekpe-jeginde, ıaǵnı 1/16 fınalda Nıgerııa ókili Shýkýra Karımnen utylyp qaldy.
Osylaısha Italııaǵa attanǵan bes burymdy boksshymyzdyń bireýine de joldama buıyrmady.
Alaıda, osy lıtsenzııalyq týrnırge deıin áıelder quramasy el qorjynyna bir joldama salyp úlgergen bolatyn.
Ony ótken jyly Hanchjoýdaǵy Azııa oıyndarynda (Qytaı) 57 kelide álem chempıonatynyń 3 dúrkin júldegeri, 27 jastaǵy Karına Ibragımova qanjyǵasyna baılaǵan edi.
Esterińizge sala keteıik, búgin Aıbek Oralbaı shırek fınalda AQSh boksshysy Djamar Tellıdi utyp, Parıj olımpıadasyna joldama jeńip alǵanyn jazǵan edik.
