Býrabaıda qoqys óńdeıtin zaýyt salynady

BÝRABAI. QazAqparat – Býrabaı demalys aımaǵynda qoqys óńdeıtin zaýyt salynady. Bul týraly QR Ekologııa, geologııa jáne tabıǵı resýrstar mınıstrligi uıymdastyrǵan respýblıkalyq reıd barysynda belgili boldy, dep habarlaıdy QazAqparat tilshisi.

«Jyl sońyna deıin Býrabaı aýdany, demalys orny jáne Şýchınsk eldimekeninen shyǵatyn qoqys-qaldyqty óńdeıtin zaýyt salý josparlanyp otyr. Zaýyt ınvestordyń esebinen salynady jáne ol úshin 200 mln teńge kóleminde qarajat jumsalmaq. Taǵy bir aıta ketetin jaıt - zaýyt tek qana qoqysty tazalap qana qoımaı, ony suryptap, óńdeıdi», - deıdi Aqmola oblysy Býrabaı aýdany energetıka jáne turǵyn úı-kommýnaldyq sharýashylyǵy bóliminiń basshysy Ádilet Rahymjanov.

Bólim basshysynyń aıtýynsha, qazirgi ýaqytta Býrabaıdaǵy qoqys polıgonynda 60 myń tekshe metr qoqys jatyr.

Aıta ketsek, buǵan deıin elimizdegi demalys oryndarynyń tazalyǵyn baqylaıtyn respýblıkalyq reıd bastalǵanyn habarlaǵan bolatynbyz.