Býrabaıda ekotýrzımdi damytý máselesi talqylandy
Shara Aqmola oblysy ákimdiginiń qoldaýymen Nur-Sultan qalasynda ótken Ortalyq Azııa sarapshylarynyń 2-shi forýmy sheńberinde uıymdastyryldy. Ony Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty (QSZI), BUU-nyń Ortalyq Azııa boıynsha preventıvti dıplomatııa jónindegi óńirlik ortalyǵy uıymdastyrdy.
Sharaǵa Aqmola oblysynyń ákimi Ermek Marjyqpaevtyń atynan oblys ákiminiń orynbasary Marat Iǵalıev qatysyp, quttyqtaý sóz sóıledi.
«Bıyl Býrabaı demalýǵa TMD elderinen keletin týrıster sany boıynsha Qazaqstandaǵy kýrorttardyń ishinde kósh bastap tur. Býrabaıda týrızmdi damytý baǵytynda naqty jumystar júrgizilýde. Kýrortty aımaqta qoljetimdi ortasha klasty jańa otelder salynýda. Sonymen qatar, «Aq býra» atty jańa kýrorttyń qurylysy júrip jatyr. Býrabaımen birge, Zerendi kýrorty da qatar damý ústinde. Sandyqtaý aýdanynyń da týrıstik áleýeti joǵary.
Ortalyq Azııa elderi jalpy týrıstik brendti damytýda birlesip jumys istegeni durys. Býrabaıǵa keletin týrısterdiń kópshiligi reseılikter. Olardyń Ózbekstan, Qyrǵyzstan, Tájikstan jáne Túrikmenstan elderinde de bolatyny sózsiz. Sondyqtan, bizderdi Eýropadaǵy Shengen tıpi boıynsha Ortalyq Azııa vızasynyń paıda bolǵany qyzyqtyrady. Ásirese, Ortalyq Azııa elderi basshylary men sarapshylarynyń búkil dúnıejúzinde Ortalyq Azııany biryńǵaı óńir retinde damytýy qýantady, – dep atap ótti M. Iǵalıev.
Dúnıejúzilik qaýymdastyq atynan BUU-nyń Ortalyq Azııa boıynsha preventıvti dıplomatııa jónindegi óńirlik ortalyǵynyń arnaıy ókili N.German bolsa, sharanyń ekotýrızmdi damytýdaǵy mańyzdylyǵyna toqtaldy.
«Býrabaıǵa alǵash ret kelip otyrmyn. Munda baıqaǵanym Qazaqstan tarıhyndaǵy kıeli oryndar men qazirgi zamańǵy tehnologııa jáne ıdeıalar úılesim tabady. Investıtsııa tartý jáne týrızmdi damytý baǵyty durys jolǵa qoıylǵan. BUU-nyń Ortalyq Azııa boıynsha preventıvti dıplomatııa jónindegi óńirlik ortalyǵy áriptestikti keńeıtýge múddeli», dedi N.German.
Sonymen qatar, shara barysynda Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń (QSZI) halyqaralyq zertteý bóliminiń basshysy Ásel Nazarbetova, qazaqstandyq trevel-bloger Nurjan Alǵashov, Qyrǵyzstan Respýblıkasynyń Strategııalyq zertteý ulttyq ınstıtýty dırektorynyń orynbasary Aıdaı Temıkeeva, Ózbekstan Respýblıkasy Prezıdenti janyndaǵy Strategııalyq jáne aımaqaralyq zertteýler ınstıtýty (SAZI) ortalyǵynyń basshysy Bahtıer Mustafaev ta óz oıyn ortaǵa saldy.
Shara qorytyndysy boıynsha Ortalyq Azııa elderiniń taldaý ortalyqtarynyń basshylary men BUU-nyń Ortalyq Azııa boıynsha preventıvti dıplomatııa jónindegi óńirlik ortalyǵynyń arnaıy ókilderi Ortalyq Azııa sarapshylarynyń 2-shi forýmy otyrysy hattamasyna qol qoıdy. Osy qujat sheńberinde oǵan qatysýshy elder odan ári áriptestikti damytyp, sý-ekologııalyq, sý-energetıkalyq jáne ekotýrızm salasynda birlesip jumys isteıtin bolady.
