Býrabaıda dámhana órtenip, 4 gaz ballony jaryldy

BÝRABAI. QazAqparat – Aqmola oblysynyń Býrabaı aýdanynda 40-qa jýyq órt sóndirýshi jazǵy dámhanada oryn alǵan órtti sóndirdi, dep habarlaıdy QazAqparat óńirdiń Tótenshe jaǵdaılar departamentine silteme jasap.

Býrabaı aýdany, Býrabaı aýylyndaǵy jazǵy dámhanada órt shyqqany týraly habarlama 5 shildede saǵat 03.09-da túsken.

Shaqyrtý ornyna birden Tótenshe jaǵdaılar departamentiniń jeke quramynyń 38 adamy men 10 tehnıkasy, «Býrabaı» memlekettik ulttyq tabıǵı parkiniń 2 qyzmetkeri men 2 tehnıkasy jóneltildi.

Qabyldanǵan jedel is-sharalardyń arqasynda saǵat 04.13 oqshaýlanǵan órt, 05.04-te joıyldy.

Jaraqat alǵandar men zardap shekkender joq.

Órttiń shyǵý sebebi anyqtalyp jatyr.

«Kelgen ýaqytta jazǵy dámhananyń ǵımaraty tolyǵymen órtke oranǵany anyqtaldy. Bul, habarlamanyń kesh túskenin kórsetedi. Lezde qosymsha kúshter men quraldardy tartý týraly sheshim qabyldandy. Sóndirý kezinde 4 gaz ballony jarylyp, bul jalynnyń kórshiles ǵımarattarǵa odan ári tez taralýyna áser etti.

Jedel qabyldanǵan sharalar ottyń turǵyn úılerge taralýynyń aldyn aldy», - dedi Şýche qalalyq jasaǵynyń bastyǵy Rýslan Bazarbaev.

Aqmola oblysynyń Tótenshe jaǵdaılar departamenti oblys qonaqtary men turǵyndaryna órt qaýipsizdigi erejelerin saqtaý qajettigin eske saldy. Órt bolǵan jaǵdaıda dereý «101» jáne «112» telefondaryna habarlasý qajet.