Bulandyda kópqabatty 2 turǵyn úı salynýda
Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda aıtylǵan agrobıznesti damytý, páter kezegindegi turǵandardyń baspana máselesin sheshý jáne bıznestiń áleýmettik jaýapkershiligin arttyrýǵa nazar aýdarǵan bolatyn. Qazirgi kezde, aýdan ortalyǵy Makınsk qalasynda 4,5 myń sharshy metr aýmaqta jańa 40 jáne 45 páterli eki turǵyn úıdiń qurylysy júrgizilýde.
Qazirgi kezde atalmysh úılerdiń qazyǵy qaǵylyp, qurylys mańy qorshaldy. Sonaı-aq, betonnan irgesitasyn quıý jumystary júrgizilýde.
Bulandy aýdandyq qurylys bóliminiń basshysy Sáken Syzdyqovtyń aıtýynsha, atalmysh turǵyn úılerdi keler jyldyń ortasynda tapsyrý josparlanǵan.
«Qazirgi kezde qurylys jumystary qarqyn ala bastady. Keler jyly paıdalanýǵa berilgen kezde páter kezegine turǵan 85 adam baspanaly bolady», - dep atap ótti Sáken Syzdyqov.
Sonymen qatar, jýrnalıster «Jýravlevka-1» JShS sharýasyn dóńgeletip otyrǵan bes eldi mekenniń biri Kapıtonovka aýylynyń tynys-tirshiligimen tanysty.
«Bizdiń agrofırma óńirde alǵashqylardyń biri bolyp, naqy eginshilik ádisin tájirıbege engizdi. Egistik alqaptar 100 paıyz tsıfrlandyryldy», - deıdi «Jýravlevka-1» JShS dırektorynyń orynbasary Qaıyrnısa Battalova.
Onyń aıtýynsha, sharýashylyqtyń 38,5 myń gektar egistik jerleri bar. Bıdaıdan bólek ózge de daqydar tuqmdaryn ósirýge kóńil bólingen. Onyń ishinde 7666 gektarǵa maıly daqyldar, 11101 gektarǵa arpa, 1735 suly, 60 gektarǵa burshaq egiledi. Mal azyǵy 9 myń gektardan astam alqapta ósiriledi.
Bul sharýashylyqqa iri qara men jylqy tárizdi túlik túrlerin damytýǵa múmkindik beredi. Sharýashylyq menshiginde 1710 bas iri qara (onyń 571 sıyr) jáne 265 jylqy bar. 788 bas iri qaraǵa arnalǵan mal bordaqylaý alańy da jumys isteıdi. Jalpy, kásiporynda 435 adam eńbekpen qamtylyp otyr. Olardyń ortasha aılyǵy 150 475 teńgeni quraıdy.
«Jýravlevka-1» JShS jergilikti turǵyndar men jas mamandardyń baspana máselesin sheshýge de belsendi atsalysyp keledi. Jastardyń bilim alǵan soń týǵan aýylyna qaıtyp kelip, jumys isteýine barlyq jaǵdaı jasaýda. Aýyl mektebine aǵymdaǵy jóndeý jumystaryn júrgizý úshin jyl saıyn qarjy bólip turady. Kapıtonovka orta mektebinde «Nur Otan» partııasynyń bastamasymen qolǵa alynǵan «Tsıfrly Qazaqstan» memlekettik baǵdarlamasyn júzege asyrýda osy seriktestik qoldaý bildirdi. Qyrkúıektiń 1-nen bastap mektepte ІT synyp ashylyp, balalar baǵdarlamalaý, 3D modeldeý jáne robot qurastyrýdyń qyr-syryn meńgerýde. Keleshekte, jańa tehnologııa men tsıfrlandyrý baǵdarlamasyn úırenetin bolady.
«Men 5-shi synypta oqımyn. ІT synypta «Ǵarysh jáne kún júıesi», «Fýtbol» jáne «Jarys» tárizdi oıyndardy qurastyrdym. Maǵan ІT synybynda jumys isteý óte qyzyqty. Keleshekte baǵdarlamashy bolý týraly ózime arman qoıyp otyrmyn», - deıdi Kapıtonovka orta mektebiniń ustazy Stanıslav Kovalev.
