Bul standartty protsedýra - Abaev «Tsesnabankke» kórsetilgen kómek týraly

ASTANA. QazAqparat - Aqparat jáne kommýnıkatsııalar mınıstri Dáýren Abaev memlekettiń nelikten «Tsesnabankke» kómek kórsetkenin aıtyp berdi, dep habarlaıdy QazAqparat.

«Memleket bul jerde bankke emes, salymshylarǵa kómektese otyryp, aýyl sharýashylyǵy salasyn kúırep qalýynan saqtap qaldy. Elestete berińiz, aldaǵy egis naýqanynda 2 mıllıon (gektar -avt.) jyrtylǵan jerge egin egilmeı qalatyn edi. Bul degenińiz 335 eldi mekende ómir súrip jatqan 300 myńnan astam azamattyń kúnkórisi. Bul sheshim - jumys orynyn saqtaı otyryp, azyq-túlik qaýipsizdigin qamtamasyz etip, áleýetti kóterýge múmkindik berdi. Qarjylaı kómektiń bolmaı qalýynan týyndaıtyn máselelerdiń tizimi shynynda da budan da uzaǵyraq edi», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Mınıstr sonymen birge, «nelikten memleket bir bankke kómektesedi, al ekinshisine kómektespeıdi?» degen suraqqa jaýap berdi.

«Bul jerde júıe quraýshy bankter baryn túsiný kerek. Ol bankter iri qurylym. Eger osy júıequraýshy banktiń jumysynda másele týyndaı qalsa, onyń áserin salymshy bolý, bolmaýymyzǵa qaramastan árbirimiz sezinemiz. Memlekettiń pozıtsııasy qatań ári naqty - berilgen barlyq aqshany bank belgilengen merzimde berýi kerek. Sonymen birge, óz bankine kómektesý tájirıbesi búkil álemde baryn eske salǵym keledi. Máselen, Germanııa óz bankine 50 mlrd eýro bóldi. Bul degenińiz esepteıtin bolsaq, iriligi jaǵynan ekinshi bankke bólingen 20 trln teńge degen sóz. Italııa bıligi óz bankterine birneshe jyl buryn 20 mlrd dollar bóldi. Meniń oıymsha, bankterdi qoldaý jáne olardan problemaly aktıvterin satyp alý boıynsha bul standartty protsedýra», - dedi Dáýren Abaev.

Eske sala ketsek, buǵan deıin QR Qarjy mınıstri Álıhan Smaıylov «Tsesnabankke» ne úshin kómek kórsetilgendigin túsindirgen bolatyn.