Bul ataq maǵan serpin beredi – eńbek sińirgen eń jas sport sheberi

ASTANA. KAZINFORM — Qazaqstanda «Qazaqstan Respýblıkasynyń eńbek sińirgen sport sheberi» ataǵy tuńǵysh ret oqýshyǵa berildi. 

Jas álem chempıony Jibek Joly arnasynyń «Búgin LIVE» baǵdarlamasynda qonaq boldy.

— Eńbek sińirgen sport sheberi ataǵyn alǵanda keremet áserde boldym. Jeńildikti sezindim. Bul biraz eńbektiń nátıjesi. Maǵan jańa jetistikterge jetýge serpin beredi. Jańa maqsat qoıyp, jańa belesterdi baǵyndyrýǵa kómektesedi. Shynynda bul ataqty beredi dep múlde kútpegen edim, — deıdi Aldııar Ańsat.

Eń jas eńbek sińirgen sport sheberi shahmat oınaýdy ákesinen úırenipti.

— Shahmatty 4 jasymnan beri oınaımyn. Ákem úıretken. Ózi de shahmatshy bolǵan. 5 jasymda Astanadaǵy ortalyq shahmat klýbyna aparyp, sol jaqta jattyqtym. Ata-anam kishkentaı kezimnen túrli jarystar men týrnırlerge alyp baratyn. Sabaq pen shahmatty qatar alyp júrý azdap qıyn. Biraq maǵan muǵalimderim únemi kómektesedi. Negizi úlgerýge bolady, — deıdi stýdııa qonaǵy.

Aldııar álemge tanymal Magnýs Karlsenniń oıynyn unatady eken. Biraq eshkimdi kýmırim dep eseptemeımin degen álem chempıony erekshe jarystarynyń birin esine aldy.

— Meniń erekshe oıyndarym óte kóp. Mysaly, 2024 jyly Brazılııada ótken álem chempıonatynyń 10-oıynynda norvegııalyq qarsylaspen básekelestim. Sol oıynym sátsiz boldy. Utylǵaly turǵanmyn. Biraq qarsylasym da jańylysyp, saıys nátıjesi teń tústi. Sol oıyn maǵan álem chempıonatynyń kúmis júldesin alýǵa kómektesti, — deıdi ol.

Stýdııa qonaǵy jaqsy nátıje kórsetý úshin talmaı eńbektený kerek deıdi.

— Kúnine birneshe saǵat shahmatpen aınalysamyn. Debıýt, taktıka, oıyndy saraptaý jumystaryn jasaımyz. Al jarys kezinde táýlik boıy daıyndalamyz. Adam eń birinshi ózine senip, aldyna maqsat qoıý kerek, — dedi eńbek sińirgen sport sheberi.