Buqtyrma sý qoımasyndaǵy qaıǵyly jaǵdaıdan soń qaýipti jerlerge kúzet qoıyla bastady

ÓSKEMEN. QazAqparat – Shyǵys Qazaqstan oblysy Samar aýdanynda kólik muz astyna ketip, áıel adam kóz jumǵan ýchaskede polıtseıler kezekshilik etedi, dep habarlaıdy QazAqparat tilshisi.

ShQO TJD málimetinshe, Samar aýdanyndaǵy Buqtyrma sý qoımasynda kólik júrgizýshilerine muz ústimen júrýge tyıym salynǵan. Alaıda bul eskertýdi elemeıtinder de bar.

«Muz ústinde kólikterdiń qozǵalysyna tosqaýyl qoıý úshin táýlik boıy jumys isteıtin statsıonarlyq beket qoıyldy. Onda polıtsııa qyzmetkerleri kezekshilik etýde», - delingen aqparatta.

Eske salsaq, ShQO-da 6 jeltoqsan kúni saǵat 19.40 kezinde 5 adam otyrǵan kólik muz astyna qulaǵan.

Tórteýi kólikten shyǵyp úlgerip, 72 jastaǵy áıel sýǵa batyp ketken edi. Alaıda áıeldiń denesi birden tabylmady.

Súńgýirlerge aýanyń tómen temperatýrasy men sý astyndaǵy qarańǵylyq qıyndyq keltirgen.

8 jeltoqsanda túski ýaqytta áıeldiń denesi tabyldy. Barlyǵy 9 ret sý astyna túsý jumystary júrgizildi.

ShQO Polıtsııa departamenti atalǵan fakti boıynsha sotqa deıingi tergeý amaldary júrgizilip jatqanyn habarlaǵan.