Buqtyrma sý qoımasyndaǵy kópir eki jaǵalaýdy biriktiredi
ÓSKEMEN. KAZINFORM – Shyǵys Qazaqstan oblysyndaǵy Buqtyrma sý qoımasy arqyly ótetin kópir eń iri jasandy sý qoımasynyń eki jaǵalaýyn biriktiredi.
ShQO Aqparattyq ortalyǵynyń málimetine súıensek, kópir jyl sońyna deıin tolyq salynyp bolǵan soń buryn saǵattap ótýge týra kelgen qashyqtyqty týra tórt mınýtta júrip ótýge bolady. Bul Shyǵys Qazaqstan oblysynyń alty aýdanynyń turǵyndary úshin tarıhı oqıǵa.
Turǵyndar kópir salynýyn 50 jyldan astam ýaqyt kútti. Adamdardyń Buqtyrma sý qoımasynyń bir jaǵasynan ekinshi jaǵasyna jetýiniń tek úsh joly boldy — parom, muzdy kesip ótý jáne jeńil kólikter úshin 570 shaqyrymdyq, júk kólikteri úshin 750 shaqyrymdyq aınalma jol.
«Kópir birinshi kezekte óńirdiń áleýmettik-ekonomıkalyq damýyna oń serpin beredi. Túrli taýar baǵasy da retteledi, sebebi buryn barlyq taýardyń baǵasyna paromdy tasymaldaý quny kiretin. Kópir arqyly kólik qozǵalysynyń iske qosylýy Qytaı men Reseı Federatsııasy arasyndaǵy taýar aınalymyn da jaqsartady», — delingen málimette.
Buqtyrma sý qoımasy álemdegi eń iri bes sý qoımasynyń biri. Al Qazaqstandaǵy eń úlken jasandy sý qoımasy. Shyǵys Qazaqstan úshin bul ári qaraı damytýdy qajet etetin úlken týrızm klasteri. Sońǵy málimetterge sáıkes, jaz kezinde jaǵalaýǵa 15 myńnan astam týrıst keledi.
Bul Qazaqstandaǵy eń uzyn kópir bolaıyn dep tur. Onyń uzyndyǵy — 1316 metr. Barlyq qurylys jumystaryn shyǵysqazaqstandyq kópir salýshylar júrgizip jatyr.
«Buqtyrma sý qoımasy arqyly ótetin kópirdiń ótkizý qabileti táýligine 20 myń kólikti quraıdy. Biraq onyń ekonomıkaǵa, logıstıkaǵa jáne halyqtyń áleýmettik ál-aýqatynyń deńgeıine áseri áldeqaıda mańyzdy. Qurylys jumystary oblys ákiminiń turaqty baqylaýynda», — delingen habarlamada.
