Buqtyrma ózeninde muzda jarylys jasaldy
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda muz keptelisiniń aldyn alý jumystary júrgizildi.
ShQO Tótenshe jaǵdaılar departamenti baspasóz qyzmetiniń málimetine súıensek, Katonqaraǵaı aýdanyna qarasty Barlyq aýylynyń mańyndaǵy Buqtyrma ózeninde muzda jarylys jasaldy. Sonyń nátıjesinde, 7866 sharshy metr muz usaqtaldy.
- Muzdyń eń qalyń jerlerinde, ózenniń jińishke nemese baǵytyn ózgertýi múmkin ýchaskelerinde birneshe jarylys jasaldy. Qutqarýshylar mamandardyń muz ústinde qaýipsiz jumys isteýin qamtamasyz etti, - delingen aqpartta.
Óńirde bul baǵyttaǵy jumystar naýryz aıynyń basynan beri júrgizilip keledi. Jalpy, oblys aýmaǵyndaǵy ózenderde 146 726 sharshy metr muz usaqtalǵan.
Eske salsaq, buǵan deıin ShQO-da qar kóshkini qaýpine baılanysty tasjoldardyń biri jabylǵany habarlanǵan.