Búkilálemdik bank: Nur-Sultan sýbmemlekettik reıtıngte kórsetkishin jaqsarta tústi
«Bıznesti júrgizý baǵytyndaǵy Jahandyq baıandamada Qazaqstan joǵary kórsetkishke ıe. Ol álemniń damyǵan otyz eliniń qataryna enedi. Sońǵy 16 jyldyń ishinde Qazaqstan barlyǵynan jyldam reforma jasap úlgerdi. Alaıda sýbmemlekettik zertteý jumysyn nelikten júrgizý kerek boldy? Jahandyq zertteý kezinde biz Almaty qalasyna mán beremiz. Al Qazaqstannyń basqa aımaqtary eskerilmeıtin. Sol sebepti, iri qalalarǵa ǵana mańyz bermeı, barlyq aımaqtarǵa nazar aýdarǵan jón. Bıznes-retteýdi nelikten júrgizý kerek? Óıtkeni, biz kásipkerlikti jigerlendirip, jeke sektorda jumys oryndaryn ashýdy josparlaımyz. Kez kelgen memlekette jeke sektor mańyzdy faktor sanalady. Durys jolǵa qoıylǵan bıznes - protsedýralardy retteýde joǵary mańyzǵa ıe», - dedi Rıta Ramalo.
Onyń aıtýyna qaraǵanda, zertteý barysynda bıznes-retteýdiń deńgeıi ólshenedi. «Qazaqstandaǵy bıznesti júrgizý» zertteýine segiz qala - Qostanaı, Almaty, Óskemen, Aqtóbe, Pavlodar, Qaraǵandy, Shymkent jáne Nur-Sultan qalalary engen.
«Eger Almatyny Nur-Sultanmen salystyratyn bolsaq, jaǵdaıdyń nelikten aıyrmashylyǵy baryn ańǵaramyz. Naqty baǵyttardy ólsheý jolymen reformalardyń bolashaǵy aıqyndalady. Baıandamaǵa sáıkes, alǵashynda zerttelgen segiz qala kásipkerlik salada kórsetkishin jaqsarta tústi. Ásirese, Nur-Sultan qalasynyń ındıkatorynda aıtarlyqtaı ósim bar», - dedi Búkilálemdik banktiń sarapshysy.
Baıandamada aıtylǵanyndaı, bıznes úshin jaıly jaǵdaı Almaty qalasynda qalyptasqan.
Aıta ketsek, sýbmemelkettik reıtıng tórt kórsetkish - kásiporynnyń ashyqtyǵy, qurylysqa ruqsat alý tártibi, elektr júıelerine qosylý kórsetkishi men jeke múlikti tirkeý sharttary boıynsha júrgiziledi.
Eske sala keteıik, Búkilálemdik bank Qazaqstannyń búkil óńirlerine sýbulttyq reıtıng júrgizetinin buǵan deıin habarlaǵan bolatynbyz.
