2,5 mln teńge: búginnen bastap dekrettik tólemderge shekteý engizildi

ASTANA. KAZINFORM — Búginnen bastap dekrettik tólem tártibi ózgerdi. Endi jalaqysy joǵary áıelderdiń bala bosanǵany úshin alatyn áleýmettik tólemine shekteý qoıylady. Bul ózgeristiń basty sebebin «Memlekettik áleýmettik saqtandyrý qory» AQ resmı ókili Gúlbaǵıla Bolatbekova túsindirdi. 

— Sońǵy 1-2 jyldyń ishinde kóptegen jeke tulǵa dekrettik tólemniń kólemin kóbeıtý úshin túrli áreketke baryp júr. Olar jalǵan jumys oryndaryn, jalǵan eńbek sharttaryn kórsetip, jalǵan kásipkerlik ashqan. Onda áleýmettik aýdarymdar tólep, birneshe jumys ornyn kórsetken. Nátıjesinde dekrettik tólemdi de kóp mólsherde alady. Bul máseleni sheshý úshin osyndaı ózgerister engizildi, — dedi Gúlbaǵıla Bolatbekova agenttik tilshisine.

«Memlekettik áleýmettik saqtandyrý qory» AQ resmı ókili endi dekrettik tólemder qalaı esepteletinin túsindirdi.

— Qazirgi tańda engizilgen eń basty ózgeris — shekteý qoıý. Eń aldymen, eń tómengi jalaqynyń 7 eselengen mólsherin esepteımiz. Qazirgi tańda bul — 595 myń teńge. Eńbek kodeksine sáıkes, júktiliktiń 30-aptasynan bastap bala týǵanǵa deıin 70 kún, týǵannan keıin 56 kúnge áıelge eńbekke ýaqytsha jaramsyzdyq paraǵy beriledi. Dál osy 126 kúndi 30 kúnge bólsek, 4,2 koeffıtsıent shyǵady. Endi 595 myńdy 4,2 koeffıtsıentke kóbeıtsek, 2,5 mln teńge bolady. Bul — eń joǵarǵy áleýmettik tólemniń mólsheri, — deıdi maman.

Demek, dekrettik tólem alatyn áıeldiń ortasha jalaqysy 595 myń teńgeden kóp bolsa da, oǵan beriletin áleýmettik tólem 2,5 mln teńgeden aspaıdy. Al ortasha jalaqysy 595 myń teńgeden az shyǵatyn áıelderdiń dekrettik tólemi basqasha esepteledi.

— 3 jerde jumys isteıtin jáne ár jumys ornynan 100 myń teńgeden jalaqy alatyn áıelder bolsa, ol 3 jerdegi jalaqysyn qosady. Eger onyń 12 aıdaǵy ortasha jalaqysy 300 myń teńge shyqsa, ony 4,2-ge kóbeıtedi. Nátıjesinde mıllıonnan artyq soma kóleminde áleýmettik tólem alady, ıaǵnı mundaı azamattarǵa eshqandaı ózgeris joq. Ózgeris tek qana joǵary jalaqy alatyn áıelderge beriletin dekrettik tólemge engizildi, — dedi ol.

Aıta keteıik, eger áıel balany aýyr bosansa nemese 2 jáne odan da kóp sábı týsa, oǵan taǵy 14 kúnge eńbekke jaramsyzdyq paraǵy beriledi. Demek, mundaı jaǵdaıda taǵy 2 aptaǵa áleýmettik tólem alýǵa múmkindigi bar.

Sonymen qatar Gúlbaǵıla Bolatbekova jalǵan kásipkerlik ashyp, dekrettik tólemin ulǵaıtqysy kelgenderge tekseris áli de jalǵasyp jatqanyn aıtty.

— Biz kásipkerlik pen eńbek sharttaryn anyqtaıtyn qujattardy alamyz. Al onyń jalǵan ne rastyǵyn quqyq qorǵaý organdary anyqtaıdy. Kásipkerligi bar azamattar ádette eń tómengi jalaqyny kórsetedi. Al júktilik bastala sala joǵary jalaqyny kórsetedi. Mundaı azamattar da kúdikke iligedi. Eńbekke jaramsyzdyq paraǵyn alǵannan soń kásipker retinde tirkelip, eńbek shartyn jasassa, onyń áleýmettik aýdarymdary esepke alynbaıdy, — dedi ol.

Eske sala keteıik, júktilik jáne bosanýǵa qatysty asyra tólem alǵan 113 kelinshekke qylmystyq is qozǵalǵan edi. 

Eńbek jáne halyqty áleýmettik qorǵaý mınıstrligi júktilik pen bosaný tólemderiniń somasyn úlkeıtýdiń ádisterin úıretetin konsýltatsııalyq qyzmetterdiń ústinen shaǵym túsirgen bolatyn. 

Vedomstvo «Mıllıonmen dekretke» kýrsy avtorlarynyń jaýapqa tartylýy týrasyndaǵy suraqqa jaýap berdi.