Búgingi Senat otyrysynda bir ǵana zańdy maquldaıdy
ASTANA. KAZINFORM – Búgin Senattyń jalpy otyrysy ótedi. Onda depýtattardyń qaraýyna buǵan deıin Májilis qabyldaǵan bir ǵana zań shyǵarylmaq.
Ádette ár dúısenbide Senat tóraǵasy Máýlen Áshimbaevtyń tóraǵalyǵymen bıýro otyrysy ótkizilip, onda beısenbide ótetin palatanyń otyrysynda senatorlar qaraýyna shyǵarylatyn zań jobalary bekitiletin. Osy aptanyń basynda palata tóraǵasy, Álemdik jáne dástúrli dinder kóshbasshylary Sezi Hatshylyǵynyń basshysy Máýlen Áshimbaev Saýd Arabııasy Konsýltatıvtik keńesiniń shaqyrýymen atalǵan elge saparmen barǵan edi. Sapar barysynda Er-Rııadta Koroldiktiń Konsýltatıvtik keńesiniń Tóraǵasy Abdalla ben Muhammed ben Ibrahım Ál-Ash-Sheıhpen jáne Islam isteri, ýaǵyz jáne nasıhat mınıstri Abdýlatıf ben Abdelazız ben Abdrahman Ál-Ash-Sheıhpen kezdesýler ótkizdi. «Din lıderleri ádiletti jáne qaýipsiz álem úshin» atty dóńgelek ústelge qatysty. Dúnıejúzilik ıslam lıgasynyń basshylyǵymen kezdesti. Sondyqtan dástúrli bıýro otyrysy ótpedi.
Degenmen, búgingi palata otyrysynyń kún tártibine 1 ǵana zań shyǵarylǵany belgili. Ol – «Kórsetiletin qyzmetterdiń erkin saýdasy, ınvestıtsııalardyń qurylýy, qyzmeti jáne júzege asyrylýy týraly kelisimdi ratıfıkatsııalaý týraly» Qazaqstan Respýblıkasynyń Zańy.
Senatorlar qaraýyna shyǵarylǵan qujat boıynsha Saýda jáne ıntegratsııa vıtse-mınıstri Janel Kýshýkova negizgi baıandama jasaıdy. Depýtattar kún tártibindegi máselelerdi qarap bolǵannan keıin Úkimet músheleriniń atyna depýtattyq saýal joldaýy múmkin. Al otyrystan soń BAQ ókilderine brıfıng uıymdastyrylyp, onda Janel Kýshýkova men senator Serik Shaıdarov tilshiler saýalyna jaýap beredi.
Aıta keterligi, bul zańdy Májilis depýttary osy jyldyń 26 aqpanynda qabyldaǵan edi.
Zań jobasy týraly baıandama jasaǵan Saýda jáne ıntegratsııa mınıstri Arman Shaqqalıev kelisimniń negizgi maqsaty – Táýelsiz memleketter dostastyǵyna múshe elderdiń kórsetiletin qyzmetteriniń erkin saýda aımaǵyn qalyptastyrý ekenin aıtqan bolatyn.
- Qyzmet kórsetý salasy - jahandyq ekonomıkalyq ósýdiń eń úzdik draıveri. Damyǵan elderde dúnıejúzilik jalpy ishki ónimniń shamamen 70 paıyzyn jáne damýshy elderde 50 paıyzyn qyzmetter alady. Qazaqstannyń jalpy ishki ónim qurylymynda qyzmet kórsetý úlesi 50 paıyzdan astam, al TMD elderinde bul kórsetkish 40 jáne 60 paıyz aralyǵynda. Qazir jahandyq jalpy ishki ónimdegi qyzmet kórsetý úles ósip jatyr. Zamanaýı tehnologııalardyń qarqyndy damýy aıasynda bul tendentsııa tek qana qarqyn alady. Sondyqtan biz úshin qyzmet saýdasyna erekshe kóńil bólý mańyzdy, - degen edi ol.
Onyń aıtýynsha, kelisim TMD-ǵa múshe memleketterdiń qyzmet berýshileri úshin seriktester naryǵynda neǵurlym tıimdi sharttar usyný týraly mindettemelerdi bekitýge múmkindik beredi. Sonymen qatar, TMD keńistiginde neǵurlym qolaıly ınvestıtsııalyq ahýaldy qurady. Qazaqstannyń TMD elderimen kórsetiletin qyzmetteriniń saýdasy 2024 jyldyń 9 aıynda 3,2 mlrd AQSh dollary boldy. Bul rette eksporttyq qyzmet kórsetý 1,61 mlrd dollarǵa jetti. Onyń ishinde iskerlik, kólik, telekommýnıkatsııalyq, ekologııalyq, qarjylyq jáne bilim berý, qurylys jáne týrızm sııaqty qyzmet salalarynda kepildik beredi. Al TMD elderinen kelgen telekommýnıkatsııa, kompıýterlik jáne aqparattyq qyzmet, týrıstik, tehnıkalyq baǵytta ımporttyq qyzmet kórsetý 1,59 mlrd AQSh dollary kóleminde bolady.
- Sonymen qatar, kelisimde halyqaralyq tájirıbege sáıkes, ınvestorlardyń múddesin qorǵaýdyń joǵary deńgeıi eskerilgen. TMD elderinen Qazaqstan Respýblıkasyna tikeleı sheteldik ınvestıtsııalardyń jalpy aǵyny byltyrǵy 9 aıda 2,8 mlrd AQSh dollaryn qurady. Qujatqa Qazaqstannyń memlekettik satyp alý, jer máseleleri, jer qoınaýyn paıdalaný, tabıǵı monopolııalar, jańartylatyn energııa kózderin retteý sııaqty máseleleri jatpaıdy. Kelisimdi ratıfıkatsııalaý TMD memleketteriniń saýda-ekonomıkalyq yntymaqtastyǵyn keńeıtýge, kórsetiletin otandyq qyzmetter eksportyn yntalandyrýǵa, qazaqstandyq kásiporyndar TMD-da óz fılıaldardyń ashý kezinde, qolaıly jaǵdaı jáne ózara ınvestıtsııalardy tartýǵa múmkindik beredi, - degen bolatyn mınıstr.
Kelisimge Qazaqstannyń memlekettik satyp alý, jer máseleleri, jer qoınaýyn paıdalaný, tabıǵı monopolııalar, jańartylatyn energııa kózderin retteý sııaqty máseleleri jatpaıdy. Kelisimdi ratıfıkatsııalaý TMD memleketteriniń saýda-ekonomıkalyq yntymaq-tastyǵyn keńeıtýge kórsetiletin otandyq qyzmetter eksportyn yntalandyrýǵa qazaqstandyq kásiporyndar TMD-da óz fılıaldardyń ashý kezinde, qolaıly jaǵdaı jáne ózara ınvestıtsııalardy tartýǵa múmkindik beredi.