Búgingi sammıtten 33 elden kelgen 150 BAQ ókili aqparat taratyp jatyr

ASTANA. KAZINFORM — Búgin Astanada ótip jatqan Shanhaı yntymaqtastyq uıymynyń 24-shi sammıtinen 33 memleketten kelgen 150 sheteldik BAQ-tyń 700 ókili aqparat taratyp jatyr. Bul jaıynda Prezıdenttiń keńesshisi — baspasóz hatshysy Berik Ýálı habarlady. 

Olardyń arasynda Úndistan, Iran, Qytaı, Qyrǵyzstan, Pákistan, Reseı, Tájikstan, Ózbekstan, Belarýs, Mońǵolııa, Ázerbaıjan, Qatar, BAÁ, Túrkııa, Túrikmenstan, Ulybrıtanııa, Japonııa, Italııa, Germanııa, Frantsııa, Serbııa, AQSh, Malaızııa, Ispanııa, Norvegııa, Chehııa, Ońtústik Koreıa, Iemen, Mysyr, Iordanıı, Lıvan, Kanada jáne Sıngapýr elderiniń jýrnalısteri bar.

«Áriptesterimizdiń yńǵaıly jumys isteýi úshin 3 baspasóz ortalyǵy Táýelsizdik saraıynda, Beıbitshilik jáne kelisim saraıynda jáne Ulttyq mýzeıde jasaqtalǵan. Búgingi mańyzdy halyqaralyq is-sharaǵa 200-ge jýyq otandyq jýrnalıst tirkeldi. Atap aıtqanda, 13 telearnadan, 28 ınternet resýrstan, 6 basylymnan kelgen áriptesterimiz sammıtten aqparat taratyp otyr»,-dep jazdy Berik Ýálı Facebook paraqshasynda.