Búgingi AES-ter 400 tonnalyq reaktıvti ushaqtyń qulaýyna tótep bere alady - Erlan Batyrbekov

ALMATY. KAZINFORM – Almatyda atom elektr stantsııasyn salý máselesi talqylandy. Qoǵamdyq talqylaýǵa jaýapty vedomstvo men ákimdik ókilderi, qoǵamdyq keńestiń músheleri, qala turǵyndary men sarapshylar qatysty.

QR Ulttyq ıadrolyq ortalyǵynyń bas dırektory Erlan Batyrbekov atom elektr stantsııalarynyń tarıhyna toqtalyp, jyldar boıy qaýipsizdik júıesi qalaı damyǵanyn baıandady.

- Atom elektr stantsııasynyń Jylý elektr stantsııalarynan aıyrmashylyǵy: bireýinde bý jasaý úshin atom reaktorynyń energııasy paıdalanylsa, ekinshisinde qazandyqta kómirsýtekti otyn jaǵylady. 1950-60 jyldary salynǵan alǵashqy atom stantsııalarynda eń tómengi qaýipsizdik júıeleri boldy. 1970-80 jyldary salynǵan ekinshi býyndaǵy AES-terde de qaýipsizdik jaqsy bolǵan joq. Ol kezde ǵalymdar ıadrolyq energııany elektr energııaǵa aınaldyrýdyń eń tıimdi joldaryn izdedi. Biraq aldymen 1979 jyly Trı-Maıl-Aılend AES-ynda, odan keıin tarıhtaǵy eń iri apat - 1986 jyly Chernobyl AES-daǵy apattardan keıin barlyq ǵalymdar qaýipsizdik máselesine jańasha qaraı bastady, barlyq nazar qaýipsizdikke aýdy. Osylaısha 3 býyndaǵy reaktorlar paıda boldy, - dedi ǵalym.

Sonymen qatar Ulttyq ıadrolyq ortalyqtyń bas dırektory Qazaqstanda salynýy múmkin atom reaktorynyń qanshalyqty qaýipsiz ekenin aıtty.

- Búgingi kúni +3 býynyndaǵy reaktorlardy salý usynylady. Onyń basty ereksheligi - onda bir-birin almastyra alatyn belsendi jáne passıvti qaýipsizdik júıeleri bar. Passıvti qaýipsizdik júıeleri toqsyz tek tabıǵat zańdylyqtaryna súıene otyryp jumys isteıdi. Al passıvti salqyndatý júıesi eshqandaı adamnyń aralaspasa da úsh kún boıy ózdiginen jumys isteı alady. Sondaı-aq 3-shi býyndaǵy reaktorlarda kóp deńgeıli qaýipsizdik júıesi qarastyrylǵan. Ol 8 balldyq jer silkinisi men 62 m/s jyldamdyqtaǵy daýylǵa, 400 tonna salmaqtaǵy reaktıvti ushaqtyń qulaýyna tótep bere alady. Biraq qandaı da bir apattyń bolý qaýpi óte tómen, - dedi ol.

Eske salaıyq, sarapshylar AES-tiń Balqash kóline qandaı áseri bolatynyn aıtqan edi.