Búgin ulttyq mereke – Respýblıka kúni

Búgin qazaqstandyqtar Respýblıka kúni merekesin atap ótip jatyr, dep habarlaıdy Kazinform.

1990 jyly 25 qazanda Joǵarǵy Keńestiń qaýlysymen memlekettik egemendik týraly deklaratsııa qabyldandy. Qujatta QazKSR egemendigi jarııalanyp, Qazaqstan táýelsiz memleket retinde tanyldy.

Odan bólek deklaratsııa aıasynda el aýmaǵynyń tutastyǵy, oǵan qol suǵylmaıtyndyǵy, Qazaqstan halqynyń tól mádenıetin, dástúrin, tilin qaıta túletý men damytý jáne ulttyq qadir-qasıetti nyǵaıtý sekildi memlekettik qaǵıdattar bekitildi.

Sondaı-aq egemendik týraly deklaratsııada elimiz memlekettik qaýipsizdik jáne ishki ister organdaryn qurý týraly aıtylǵan. Memleket basshysy, ákimshilik-atqarýshy joǵarǵy bıliktiń basshysy sanaldy.

Qazaqstan 1991 jyly 16 jeltoqsanda táýelsizdigin jarııalaǵannan keıin, 25 qazan Respýblıka kúni merekesi retinde atalyp ótile bastady.

Alaıda 2009 jyly sáýirde Respýblıka kúni merekeler qatarynan alynyp tastaldy. Ótken jyly Memleket basshysy Qasym-Jomart Toqaev Respýblıka kúni tarıhı merekesin qaıtarýdy usyndy. Odan bólek, Prezıdent Respýblıka kúnine ulttyq mereke mártebesin berý týraly sheshim qabyldady.

Osylaısha 2022 jyldan bastap qazaqstandyqtar Respýblıka kúni merekesin atap ótedi. Bul kúnderi barlyq óńirlerde túrli baǵyttaǵy mádenı, sporttyq is-sharalar uıymdastyrylady.
Bıyl Astanada Respýblıka kúni merekesine oraı elordada 200-den astam is-shara ótedi. Onyń ishinde mádenı-buqaralyq, sporttyq jáne áleýmettik, merekelik kontsertter, avtosherýler, kórmeler, balalarǵa arnalǵan kórikti jerlerge ekskýrsııalar.

Sonymen qatar, dóńgelek ústelder, ulttyq sport túrlerinen týrnırler ótkizý jáne basqa da kóptegen is-shara josparlanyp otyr.

Eske sala ketsek, Іshki ister mınıstrligi Respýblıka kúni merekesi kúni barlyq óńirde jedel shtab jumys isteıtini týraly málimet jasady. Bul kúni qoǵamdyq tártipti 20 myń polıtseı men Ulttyq ulan áskeri baqylaıdy.

Aıta keteıik, bıyl qazaqstandyqtar Respýblıka kúnine merekesine oraı bir kún (sársenbi) demalady.