Búgin kún raıy qandaı bolady

ASTANA. KAZINFORM — «Qazgıdromet» málimetinshe, 29 tamyz kúni elimizdiń batysynda, ońtústiginde jáne ońtústik-shyǵysynda batys antıtsıklonynyń yqpalymen jaýyn-shashynsyz aýa raıy saqtalady. 

 Qalǵan aýmaqtarda atmosferalyq fronttardyń ótýine baılanysty jańbyr jaýyp, naızaǵaı oınaıdy, burshaq pen ekpindi jel soǵýy yqtımal.

Respýblıka boıynsha jeldiń kúsheıýi boljanyp otyr. Eldiń ońtústik-batysy men ońtústiginde shańdy daýyl kóteriledi. Soltústikte túnde jáne tańerteń tuman túsýi múmkin.

Kúndizgi ýaqytta qatty ystyq bolady: Ulytaý oblysynda +35 °C, Jetisý men Almaty oblystarynda +35…+37 °C, al Mańǵystaý oblysynda +38 °C.

Almaty, Aqtóbe, Shyǵys Qazaqstan, Ulytaý, Jetisý, Abaı oblystarynda, Aqmola oblysynyń batysy, ońtústigi men shyǵysynda, Batys Qazaqstan oblysynyń shyǵysy, ońtústigi men ortalyǵynda, Qaraǵandy oblysynyń batysy, shyǵysy men ortalyǵynda, Atyraý oblysynyń soltústigi, ońtústigi men ortalyǵynda, Qostanaı oblysynyń batysynda, sondaı-aq Mańǵystaý oblysynda órt qaýpi joǵary bolady.

Túrkistan, Qyzylorda, Mańǵystaý, Jambyl oblystarynda, Batys Qazaqstan oblysynyń batysynda, Almaty oblysynyń batysy men soltústiginde, Jetisý oblysynyń ońtústigi men shyǵysynda, Atyraý oblysynyń shyǵysynda, Qostanaı oblysynyń ońtústiginde, sondaı-aq Qaraǵandy, Aqtóbe óńirlerinde tótenshe órt qaýpi kútiledi.