Búgin kún raıy qandaı bolady

ASTANA. KAZINFORM – «Qazgıdromet» 4 tamyzǵa arnalǵan aýa raıy boljamyn jarııalady. 

Qazaqstan aýmaǵynyń basym bóliginde aýa raıyn soltústikten kelgen antıtsıklon qalyptastyrady, sonyń áserinen jaýyn-shashynsyz kún raıy bolady. 

Sınoptıkterdiń málimetinshe, tek eldiń shyǵysy men ońtústik-shyǵysynda, sheginip bara jatqan tsıklonnyń yqpalymen jańbyr jaýyp, naızaǵaı oınaıdy. Respýblıka boıynsha jel kúsheıedi, ońtústik-batysta shańdy daýyl turady, al túnde jáne tańerteń soltústikte tuman kútiledi.

Atyraý oblysynda kúndiz aptap ystyq — 35-39 gradýsqa deıin, Mańǵystaý oblysynda — 38-40 gradýs, Batys Qazaqstan oblysynda — 35-38 gradýs, Aqtóbe oblysynyń batysynda — 36 gradýs ystyq bolady.

Pavlodar oblysynyń soltústiginde, Batys Qazaqstan oblysynyń batysy, ortalyǵy men ońtústiginde, Mańǵystaý oblysynyń soltústik-shyǵysynda, Atyraý oblysynyń batysynda órt qaýpi joǵary bolady.

Túrkistan, Almaty oblystarynda, Qyzylorda oblysynyń ońtústik jartysynda, Jambyl oblysynyń soltústigi, batysy men shyǵysynda, Atyraý oblysynyń soltústigi, shyǵysy men ońtústiginde, Mańǵystaý oblysynyń batysy, ortalyǵy men ońtústiginde, Aqtóbe, Qostanaı, Qaraǵandy oblystarynyń ońtústiginde, sondaı-aq Ulytaý, Jetisý, Abaı oblystarynyń ońtústigi men ortalyǵynda, Shyǵys Qazaqstan oblysynyń ońtústik-shyǵysynda tótenshe órt qaýpi saqtalady.

Buǵan deıin Qazaqstannyń basym bóliginde daýyldy eskertý jarııalanǵany habarlanǵan bolatyn.