Búgin fýtboldan birinshi lıgada Qazaqstan chempıonatynyń alǵashqy týry ótedi

ASTANA. KAZINFORM - Búgin, 9 sáýirde fýtboldan birinshi lıga komandalary arasyndaǵy Qazaqstan chempıonaty bastalady.

Dop dodasynda 14 komanda baq synaıdy. Alǵashqy týr oıyndary 9-10 sáýir kúnderine belgilengen.

Búgin, 9 sáýirde «Túrkistan» men «Shahter» (Qaraǵandy), «Kaspıı» (Aqtaý) men AKAS (Almaty), «Ertis» (Pavlodar) men «Ekibastuz» (Pavlodar oblysy) komandalary kezdesedi.

Al 10 sáýirde «Ońtústik Akademııa» (Shymkent) men «Altaı» (Óskemen), «Taraz» ben «Jetisaı» (Túrkistan oblysy), «SD Family» (Astana) men «Qaırat-2» (Almaty), «Han táńiri» (Almaty) men «Aqtóbe-2» oınaıdy.

Týrnır kestesinde alǵashqy eki orynǵa ıe bolǵan komandalar aldaǵy jyly Premer-lıgaǵa qatysýǵa tikeleı joldamaǵa qol jetkizedi. Bıyl «Shahter», «Ertis», «Kaspıı» komandalary úzdikter qatarynda bolady dep boljanyp otyr.

Aıta ketsek, fýtboldan ekinshi lıganyń oıyndary keshe, 8 sáýirde bastaldy.

Bıylǵy maýsymǵa barlyǵy 20 komanda qatysady. Ol byltyrǵy jylmen salystyrǵanda tórteýge az. Komandalar bıyl da eki konferentsııaǵa bólinip, birinshi lıgaǵa beriletin joldamany sarapqa salady.