Búgin birqatar óńirde saǵat tili 60 mınýtqa keıin shegerildi
ASTANA. KAZINFORM — Qazaqstanda biryńǵaı ýaqyt beldeýi (UTC+5) ornady. Astananyń EXPO alańyndaǵy «Nur Álem» sferasynda saǵat tili bir saǵatqa artqa jyljydy.
«Qazaqstan Respýblıkasynyń aýmaǵyndaǵy ýaqytty esepteý tártibi týraly» Úkimet qaýlysyna engizilgen ózgertýlerge sáıkes, Astana, Almaty, Shymkent qalalary men Aqmola, Almaty, Jambyl, Qaraǵandy, Qostanaı, Pavlodar, Soltústik Qazaqstan, Túrkistan, Shyǵys Qazaqstan, Abaı, Jetisý, Ulytaý oblystarynda 29 aqpannan 1 naýryzǵa qaraǵan túni (saǵat 00:00-de) jergilikti ýaqyt 1 saǵatqa artqa qoıyldy.
Búgingi kúnge deıin Qazaqstanda UTC+5 jáne UTC+6 eki ýaqyt beldeýi bar. El aýmaǵynyń kóp bóligi (batys oblystardy qospaǵanda) UTC+6 aımaǵynda ornalasqan.
Qazaqstanda birtutas ýaqyt beldeýin engizýdi ýaqytty esepteý máselesi jónindegi jumys tobyna kirgen qazaqstandyq ǵalymdar men sarapshylar usynǵan bolatyn.
Jumys toby 2023 jyldyń sáýirinde qazaqstandyqtardyń eń qolaıly ýaqyt beldeýine kóshý týraly birneshe márte berilgen ótinishine baılanysty quryldy.
Onyń quramyna ǵylymı ınstıtýttar, medıtsınalyq ýnıversıtetter, ortalyq jáne jergilikti memlekettik organdardyń ókilderi, Parlament depýtattary jáne t. b. kirdi.
Bir jyl ishinde medıtsına, fızıologııa, geografııa, metrologııa jáne t. b. salalardy qamtıtyn jumys tobynyń músheleri Qazaqstanda qolaıly ýaqyt beldeýin belgileý máselesin zerttedi.
Jumys toby UTC+5 biryńǵaı ýaqyt beldeýine kóshý — eń durys jáne ońtaıly jol dep tapty. Bul rette Qazaqstannyń kóptegen aımaqtary tabıǵı ýaqytqa eń jaqyn ýaqytty paıdalanatyn bolady.
Jumys toby halyqaralyq tájirıbeni zerttep, onyń barysynda álemniń 175 elinde birtutas saǵat beldeýi jumys isteıtinin, al bir saǵattyq beldeýde nebary 22 memleket turatynyn anyqtady.
Buǵan deıin ýaqyt beldeýiniń ózgerýine qalaı beıimdelý kerektigi habarlanǵan bolatyn. Poıyz ben ushaqty jiberip almaý týraly usynystar da aıtyldy.
Tsıfrlyq damý mınıstrligi qazaqstandyqtar úshin gadjetter men kompıýterdi jańartý jáne jańa ýaqyt beldeýine ýaqtyly kóshý boıynsha ámbebap nusqaýlyq daıyndaǵan edi.
