Búgin 11 qalada aýa sapasy nasharlaıdy

ASTANA. KAZINFORM — 6 sáýir kúni Qazaqstan aýmaǵynyń basym bóliginde qolaıly meteorologııalyq jaǵdaı saqtalady.

«Qazgıdromet» RMK baspasóz qyzmeti taratqan málimetke sensek, 6 sáýir, senbi kúni elimizdegi qalalardyń basym kópshiliginde meteorologııalyq ahýal birqalypty bolady.

Tek Aqtóbe, Atyraý, Astana, Pavlodar, Qaraǵandy, Jezqazǵan, Balqash, Temirtaý, Óskemen, Rıdder, Semeı qalalarynda ǵana aýa sapasy birshama nasharlaıdy.

Qolaısyz meteorologııalyq jaǵdaı — atmosferalyq aýanyń betki qabatynda zııandy zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

QMJ jaǵdaıynda eldi mekenderdegi atmosferalyq aýanyń sapasy nasharlaýy yqtımal.