Búgingi áskerı medıtsına zamanaýı standarttar men talaptarǵa qanshalyqty saı
«Ózderińizge málim, qazirgi áskerı medıtsına jalpy densaýlyq saqtaý júıesine kiredi. Sondyqtan, jalpy densaýlyq saqtaý júıesine qoıylatyn standarttar men talaptar áskerı medıtsınaǵa da qatysty. Búkil bizdiń áskerı medıtsına mekemeleri sol standarttar men talaptarǵa saı dep aıtýǵa bolady.
Áskerı medıtsınanyń tehnıkamen jabyqtalýyna toqtalatyn bolsaq, ony deńgeılerge bólemiz. Nur-Sultan, Almaty qalalaryndaǵy áskerı gospıtalderdiń jabdyqtalý deńgeıi oblystyq, respýblıkalyq mańyzdy qalalarda ornalasqan aýrýhanalardyń deńgeıine para-par. Al, óńirlerde ornalasqan gospıtalder men lazaretter, emhanalardyń jaǵdaıyna keletin bolsaq, olarda sál tómen», - deıdi ol.
Spıker áskerı medıtsınaǵa qoıylatyn talap – áskerı qaqtyǵys kezinde medıtsınalyq kómek berýge daıyndyq jaǵdaıy ekenine toqtaldy. Demek, qorǵanys mınıstrligi áskerı mobıldikti jetildirýdi mindetteıdi.
«Qazirgi kezde bizdiń qoldanysymyzda birneshe mobıldik keshenimiz bar. Ol keshendermen jabdyqtaý osy kezeńderde de jalǵasyp jatyr. Bıyl 60 kereýettik mobıldik gospıtal aldyq. Bul gospıtaldiń ereksheligi quramynda birneshe operatsııa jasaıtyn oryndar, reanımatsııalyq bólimder, naýqastardy ornalastyratyn bólimder, dıagnostıkalyq bólimshesi bar. Dıagnostıkalyq bólimshesi zamanaýı tehnıkalarmen, apparatýramen jabdyqtalǵan. Bólimshe quramyna jyljymaly tomografııa kiredi. Sonymen qatar, keshendi avtonomdy túrde gazben, sýmen, elektrmen jabdyqtaý múmkinshiligi bar. Oǵan tamaqtaný kesheni de qosylǵan. Sondyqtan, bul keshendi paıdalaný kezinde biz urys-qaqtyǵys kezinde dalalyq jaǵdaıda medıtsınalyq kómek kórsetýge daıyn ekenimizdi aıtýǵa bolady. Sonymen qatar, osy jyly sanıtarlyq-bakterıologııalyq zerthana aldyq. Ol zerthanada PTsR alý múmkindigi bar. Onymen qatar, brondalǵan transporterler aldyq», - deıdi Berik Іlııasov.
Al, medıtsınalyq kadr daıarlaý Áýe qorǵanysy kúshteri áskerı ınstıtýtyna kýrsanttar qabyldaý arqyly júrgiziledi. Áýe qorǵanysy kúshteriniń áskerı ınstıtýty Batys Qazaqstan medıtsınalyq ýnıversıtetimen kelisimshart jasasqan.
«Bıyl 26 kýrsantty qabyldadyq. Sonymen qatar, shetelge kýrsanttar jiberý arqyly da daıarlyq júrgizemiz. Osy jyly Sankt-Peterbýrg qalasyndaǵy áskerı medıtsınalyq akademııaǵa kýrsanttar jiberdik. Armenııadaǵy medıtsınalyq ýnıversıtetke de kýrsanttar joldandy. Olardyń jalpy sany - 14. Sonymen qatar, dıplomnan keıingi daıarlyqty da uıymdastyryp jatyrmyz. Profıldik mamandar daıarlaý úshin Sankt-Peterbýrgtegi akademııaǵa bıyl 7 ofıtserdi jiberdik», - deıdi spıker.
