Búgin Túrkııadaǵy 19 qazaqstandyq stýdent elge qaıtady

ASTANA. QazAqparat –Syrtqy ister mınıstrliginiń resmı ókili Aıbek Smadııarovtyń aıtýynsha, Túrkııadaǵy 19 qazaqstandyq stýdent elge qaıtady, dep habarlaıdy QazAqparat tilshisi.

«Mersın qalasyndaǵy Qurmetti konsýl, Túrkııa azamaty Ahmet Býdan qonaqúıge Qazaqstannyń 25 azamatyn, onyń ishinde 19 stýdentti panalatty. Búgin osy 19 qazaqstandyq stýdent qurmetti konsýldyqtyń uıymdastyrýymen Ankaraǵa jetkizildi jáne olar búgin keshke Ankara-Astana reısimen Qazaqstanǵa qaıtady», - dedi ol BAQ ókilderimen ótken brıfıngide.

Onyń málimetinshe, Adanada da qazaqstandyq stýdentter Ystambulǵa jetkizilgen.

«Sondaı-aq, Konıa qalasyndaǵy qurmetti konsýl 12 qazaqstandyq stýdentke Adanadan Ystambulǵa jetýge járdem kórsetti. Aıta ketetin jaıt, Túrkııadaǵy dıplomattarymyz Túrkııanyń Tótenshe jaǵdaılar basqarmasymen turaqty baılanysta», - dedi Aıbek Smadııarov.