Búgin Tartyl Fest Qaraǵandy qalasynda ótedi

QARAǴANDY. QazAqparat – Týrnıkke tartylýdan Tartyl Fest respýblıkalyq festıvali búgin Qaraǵandyda ótedi, dep habarlaıdy QazAqparat tilshisi.

QR Prezıdenti janyndaǵy «Dara» talanttardy qoldaý qoǵamdyq qorynyń qoldaýymen uıymdastyrylǵan Tartyl Fest festıvali 16-qalaǵa kelip jetti. Shara Ortalyq mádenıet demalys saıabaǵynda ótedi.

Uıymdastyrýshylardyń málimeti boıynsha, saıysqa tirkelip nómir alý rásimi saǵat 11:00-den 14:00-ge deıin jalǵasady. Saıystyń ózi saǵat 17:00-de bastalady.

Festıvalge kelgen jerlesterine Nurjan Kermenbaev ánmen qoldaý bildirmek.

Tartyl Fest festıvaliniń tártibi Qazaqstannyń barlyq 20 qalasy úshin - ortaq. Qatysýshylar jasy men salmaǵy boıynsha 9 sanatta synǵa túsedi. Oǵan resmı qazylar alqasy tórelik etýde.

10 maýsymda bastalǵan festıval 6 qyrkúıekte máresine jetýi kerek. Qatysýshy 20 qalanyń árqaısynda 27 jeńimpaz anyqtalady. Olardyń bárine aqshalaı júlde beriledi.

Qala deńgeıinde birinshi oryn alǵan jeńimpazǵa 200 myń teńge, ekinshi orynǵa 100 myń teńge, úshinshi orynǵa 50 myń teńge taǵaıyndalǵan. Qalalyq deńgeıde birinshi oryn alǵan 9 sanattyń jeńimpazdary Nur-Sultan qalasyndaǵy grand-fınalda kúsh synasady. Onyń júlde qory 54 mln teńge.

Al grand-fınal jeńimpazdary street workout-tan ótetin álem chemıponatyna qatysýǵa múmkindik alady. Jobanyń ambassadory – Aıtym Jaqypov. Ol street workout-tan birneshe ret Qazaqstannyń jáne álemniń rekordtaryn jańartqan. Al streetlifting-ten Eýropa rekordsmeni bolyp esepteledi.

Buǵan deıin Tartyl Fest festıvalinde jezqazǵandyq jeńimpazdar anyqtalǵan bolatyn.

Týrnıkke tartylý festıvali jalpy Qonaev qalasynda bastaldy. Keıin T úrkistanda , Taldyqorǵan , Almaty , Taraz , Shymkent , Aqtaý , Qyzylorda , Atyraý , Oral, Aqtóbe , Qostanaı , Petropavl , Kókshetaý qalalarynda jalǵasyn tapty.