Búgin Nur-Sultanda «Farıza» spektakli bolmaı qaldy

NUR-SULTAN. QazAqparat - Búgin «Daryn» memlekettik syılyǵynyń laýreaty, basty keıipker - Farıza Ońǵarsynovany somdaıtyn aktrısa Nazgúl Qarabalınanyń syrqattanyp qalýyna baılanysty Nur-Sultan qalasy Jastar teatrynda qoıylatyn «Farıza» spektakli ótpeı qaldy, dep habarlaıdy QazAqparat tilshisi.

Farıza Ońǵarsynovanyń 80 jyldyǵyna oraı uıymdastyrylǵan qoıylymnyń premerasy Almaty qalasyndaǵy Muhtar Áýezov atyndaǵy memlekettik akademııalyq drama teatrynda ótken bolatyn.

«Bul spektakl talaı shahardy aralady. Bul - Máskeýge baryp, kórermen qoshemetine bólenip kele jatqan týyndy edi. Keshe Nazymǵa (Qarabalına - avtor) «Bul - ǵarysh. Sen teńdessiz obraz jasadyń» dep aıtyp edim. Búgin basty keıipkerdi somdaıtyn jalǵyz aktrısa ózi bolatyn. Ony almastyratyn artıst joq. Búgin onyń densaýlyq jaǵdaıyna baılanysty qıyndyq týyndady. Biz onyń sahnaǵa shyqqanyn qalap, kóp jumys istedik. Dárigerler sahnanyń syrtynda. Sizderden keshirim suraımyz», - dedi dramatýrg, pesa avtory Roza Muqanova.

Ideıa avtory jáne spektakldiń bas prodıýseri, kompanııa jetekshisi - Aınur Kópbasarova. Pesany prodıýserlik ortalyqtyń tapsyrmasymen dramatýg Roza Muqanova jazǵan.

Kompozıtory - Renat Gaısın. Rejısseri - Farhat Moldaǵalı.

Eske sala ketsek, atalǵan spektakl elordada 15-16 qarasha kúni ótýi kerek bolatyn.