Búgin Qazaqstannyń Áskerı-teńiz kúshterine 30 jyl toldy

ASTANA. QazAqparat – 2 sáýir – Qazaqstannyń áskerı teńizshileri úshin erekshe kún. 1993 jyly 2 sáýirde el Prezıdenti Áskerı-teńiz kúshterin qurý týraly Jarlyqqa qol qoıǵan bolatyn, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Áskerı-teńiz kúshteri Kaspıı teńiziniń qazaqstandyq sektoryndaǵy memlekettiń aýmaqtyq tutastyǵyn kózdiń qarashyǵyndaı qorǵaý, el egemendigi men ekonomıkalyq múddelerin saqtaý syndy aýqymdy mindetterdi oryndaıdy.

«Qurmetti áskerı teńizshiler! Qazaqstan Respýblıkasy Qorǵanys mınıstrliginiń jáne Qarýly kúshterdiń basshylyǵy, óz atymnan Sizderdi, barsha ardagerlerdi Áskerı-teńiz kúshteriniń 30 jyldyǵymen shyn júrekten quttyqtaımyn!

Táýelsizdik tiregine aınalǵan Qarýly kúshterdiń Áskerı-teńiz kúshteri Qazaqstannyń Kaspıı teńizi sektorynda egemendi elimizdiń tynyshtyǵy men qaýipsizdigin, táýelsizdigi men el tutastyǵyn saqtaý jolynda qaltqysyz qyzmet etedi.

Áskerı teńizshiler ózderine artylǵan senimdi abyroımen oryndap, oqý-jaýyngerlik mindetterdi atqarýda kásibı sheberlik tanytyp keledi. Qurylǵan ýaqyttan bastap otyz jyl ishinde qart Kaspııdiń atyrabynda uıymdastyrylǵan barlyq keshendi jattyǵýlarda Sizder bilikti maman ekenderińizdi baıqatyp, senimge selkeý túsirgen emessizder.

Mereıli kásibı meıramda barshańyzǵa myqty densaýlyq, qajymas qaırat, qyzmette qyraǵylyq, ómirde úlken belesterdi baǵyndyrýda sáttilik tileımin!» - delingen Qorǵanys mınıstri, general-polkovnık Rýslan Jaqsylyqovtyń quttyqtaýynda.