Búgin - «Qazaq ádebıetiniń» týǵan kúni
Gazet Keńes jazýshylary Qazaqstan komıtetiniń organy retinde qurylyp, «Qazaq ádebıeti» ult mádenıetin kóterýde úlken oryn alsyn!» degen uranmen shyqty. Jyldar óte kele «Qazaq ádebıeti» eldiń rýhanı-mádenı damýyna, oqyrman arasyndaǵy estetıkalyq talǵamnyń qalyptasýyna aıryqsha úles qosqan bedeldi basylymǵa aınaldy. Ár jyldary gazetke Beıimbet Maılın, Sábıt Muqanov, Syrbaı Máýlenov, Saıyn Muratbekov, Sherhan Murtaza, Oralhan Bókeı syndy qazaqtyń birtýar azamattary redaktorlyq etti.
«Qazaq ádebıeti» gazeti 1940 jyly óz jumysyn toqtatty jáne 1955 jyly 14 qańtarda qaıta ashyldy, bas redaktory bolyp Syrbaı Máýlenov taǵaıyndaldy. On bes jyldyq úzilisten keıin gazet R.Berdibaevtyń, M.Qarataevtyń, T.Kákishevtiń til týraly asa ózekti maqalalaryn jarııalap, qazaq qoǵamyn dúr silkindirdi. 1956 jyly gazet redaktory S.Máýlenov Ortalyq komıtet tarapynan jazalandy.
Sherhan Murtaza redaktor bolǵan 80 jyldary gazet qalamgerlerdiń shyǵarmasyn taldap-tarazylaıtyn synı materıaldarmen, jalyndy jýrnalıster tolqynymen kózge tústi. Búginde «Qazaq ádebıeti» - belgili ádebıet, óner qaıratkerleriniń jańa shyǵarmalaryn qalyń oqyrmanǵa tanystyratyn odan bólek, oqý-aǵartý, bilim, ǵylym salasyndaǵy kókeıkesti máselelerdi kóteretin ulttyq basylym.
