Búgin - Dúnıejúzilik akkredıtteý kúni

ASTANA. QazAqparat - Búgin, 9 maýsym - Dúnıejúzilik akkredıtteý kúni. Bıyl bul ataýly kún «Álemdik saýdanyń bolashaǵyn qoldaý» uranymen ótip jatyr. QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Ulttyq akkredıtteý ortalyǵy (UAO) osy kúndi jumysshylardyń balalary men nemereleri úshin Ashyq esik kúni etip jarııalady, dep habarlaıdy QazAqparat.

Merekeniń erekshe sımvolıkasy - UAO jaqynda Azııa-Tynyq muhıty akkredıtteý yntymaqtastyǵynyń (ARAS) baǵalaýynan ótýi boldy. Sol arqasynda UAO ILAC jáne IAF halyqaralyq akkredıtteý uıymdarynyń tolyqqandy múshesi bolyp tabylady. Bul óz kezeginde akkredıttelgen sýbektilerge halyqaralyq naryǵynda ózara tanylatyn qujatardy berýge yqpalyn tıgizedi.

Merekelik shara shyǵarmashylyq, kásiptik baǵdar berý jáne otbasylyq sezimdi nyǵaıtýǵa arnalǵan.

Mereke qarsańynda UAO qyzmetkerleriniń balalary men nemereleri arasynda sýret pen esse baıqaýy jarııalandy. Sol arqyly balalar «Akkredıtteý degenimiz ne?» degen suraqqa jaýap berýge tyrysty.

Baıqaýǵa ondaǵan sýretter men esseler kelip tústi. Balalar shyǵarmashylyq jáne ıntellektýaldy turǵyda úlken jumys atqardy, óıtkeni «akkredıtatsııa» uǵymyn sóz jáne sýret arqyly jetkizý óte qıyn.

Sýretter qoıylǵan stendti jáne merekelik fotosessııany tamashalaǵannan keıin balalar ata-anasynyń, ata-ájesiniń jumys bólmesine bardy.

Qyzmetkerler óz jumys ornyn kórsetip, olardyń qyzmettik mindetteri qandaı, jumys kúnderi qalaı ótetinin, baǵalaýshy, taldaýshy, menedjer jáne basqa UAO mamandarynyń atqaratyn isiniń erekshelikteri týraly aıtyp berdi.

Májilis zalynda UAO Bas dırektory Talǵat Momyshev balalardy ózi kútip aldy.

– Búgin bizdiń keńsede jaqyndaryńyzdyń jumys ornynda qonaq bolyp, tanysqandaryńyzǵa qýanyshtymyn. Sizder - bizdiń bolashaǵymyz, erteńgi úmitterimiz, - dep atap ótti Talǵat Momyshev. – Úıde akkredıtteý sózin jıi estýge týra keletin shyǵar. Ol latynnyń accredo – «senim» sózinen shyqqan. Akkredıttelgen kompanııalarǵa senýge bolady. Olardyń qyzmeti men ónimderi sapaly, qaýipsiz, olar Qazaqstandaǵy jáne álemdegi eń úzdik deýge bolady.

UAO Bas dırektory balalardy akkredıtteý týraly bilimin odan ári tereńdetýge, jáne bolashaqta jaqyndarynyń kásibı jolyn jalǵastyrýǵa shaqyrdy.

Balalar men eresekterge arnalǵan úzdik qyzmetkerlerdi marapattaý rásiminen keıin 27 mamyr-2 maýsym aralyǵynda ótken Azııa-Tynyq muhıty akkredıtteý yntymaqtastyǵynyń UAO qyzmetin baǵalaý qorytyndysy jaıly beınerolıktiń tusaýy kesildi.