Búgin Astanada áıgili bestseller - «Memleketter nege damymaı qalady?» kitaby tanystyrylady
Shara barysynda oqyrmandarǵa Halyqaralyq bestseller avtorymen suhbattasyp, óz qolynan qoltańba alý múmkindigi bolady.
Daron Adjemogly men Djeıms Robınsonnyń «Memleketter nege damymaı qalady?» kitaby - Semıýel Hantıngton, Djared Daımond nemese Frensıss Fýkýıama eńbekterimen salystyrýǵa bolatyn, sońǵy ýaqyttaǵy eń iri saıası-ekonomıkalyq bestsellerdiń biri. Avtorlar tarıhshylardy, ekonomıster men fılosoftardy ǵasyrlar boıy alańdatqan suraqqa jaýap izdeıdi. «Álemdik teńsizdiktiń sebebi nede, nege álemniń baılyǵy jer betindegi elder men aımaqtarǵa birkelki bólinbeıdi?» degen suraqtardy tarqata otyryp, saıasat pen ekonomıkany zerdeleı kele jaýap berilgen. Adamzat balasy ómir súrgen barlyq ýaqyt pen keńistikti qamtýy bul kitapty saıası-ekonomıkalyq oıdyń naǵyz entsıklopedııasyna aınaldyrady.
Іs-sharaǵa fılologııa ǵylymdarynyń doktory, professor, Reseı Halyqaralyq joǵary mektep ǵylym akademııasynyń akademıgi Ádil Ahmetov, tarıhshy, tarıh ǵylymdarynyń doktory, professor, Qazaq Bilim akademııasynyń akademıgi Búrkitbaı Aıaǵan, Parakosm kompanııasynyń ıesi Sýfııan Bın Ýzaır, fılologııa ǵylymdarynyń kandıdaty, dotsent Gúlnar Saparbekova, aqyn-aýdarmashy, saıasatker, «Pero» jeke qorynyń negizin qalaýshy Elden Sarybaı, jýrnalıst, ál-Farabı atyndaǵy QazUÝ doktoranty, Kolýmbııa óner jáne ǵylym kolledjiniń «Medıa jáne komýnıkatsııalyq zertteýler» mamandyǵy boıynsha túlegi Jaınagúl Tólemis, kitapty qazaqshaǵa aýdaryp, jaryqqa shyǵarǵan «Mazmundama» qoǵamdyq qorynyń basshysy Teńiz Seıilhan men aýdarmashy Ómirzaq Aqjigit qatysady.
Sonymen qatar Qazaqstandaǵy Ulybrıtanııa elshiligi, Qazaqstan strategııalyq zertteýler ınstıtýtynyń qyzmetkerleri men kitaphananyń ǵalym-oqyrmandary jáne ZOOM platformasy arqyly qalyń oqyrmandar onlaın qatysa alady.
