Búgin 18 jasqa tolǵan QR ІІM kýrsanty alǵash ret daýys berdi

QARAǴANDY. QazAqparat – Qazaqstan Respýblıkasynyń Іshki ister mınıstrligi B. Beısenov atyndaǵy Qaraǵandy akademııasynyń jeke quramy QR Parlamenti Májilisi men máslıhattar saılaýynda daýys berdi, dep habarlaıdy QazAqparat tilshisi.

Búgin, saǵat 7:00-den bastap QR ІІM Qaraǵandy akademııasynda № 67 jabyq saılaý ýchaskesi jumys isteı bastady. Onyń jumysy saılaýdyń kúntizbelik josparyna jáne ýchaskelik saılaý komıssııasynyń jumys josparyna sáıkes uıymdastyryldy. Osy ýchaskege tirkelgen 130-dan astam saılaýshy daýys berýge keledi dep boljanýda.

Birinshi bolyp daýys berýge Akademııa bastyǵy polıtsııa polkovnıgi Aqynqalı Dármenov jubaıymen keldi.

«Saılaý – kez kelgen qazaqstandyq úshin óte mańyzdy oqıǵa. Men ózimniń azamattyq paryzymdy oryndaýǵa jáne daýys berýge otbasymmen keldim. Meniń áriptesterim men akademııa kýrsanttary da óz tańdaýyn jasaıtynyna kúmánim joq», - dep saılaýdyń mańyzdylyǵyn atap ótti akademııa bastyǵy.

Akademııa kýrsanttary da óz tańdaýyn jasady. Saılaý ýchaskesine alǵashqylardyń biri bolyp birinshi kýrs stýdenti Rahat Qanybekov keldi. Búgin Rahat 18-ge tolyp jatyr. «Qazaqstan Respýblıkasynyń saılaý týraly» Konstıtýtsııalyq zańyna sáıkes ol daýys berý quqyǵyna ıe boldy.

Daýys berý rásiminiń aldynda akademııa bastyǵy Aqynqalı Dármenov Rahatty saltanatty túrde quttyqtap, saılaýda daýys berý quqyǵyna ıe bolý qurmetine estelik syılyq tabys etti.

«Meniń kámelet jasqa tolǵan kúnimniń saılaýmen tuspa-tus kelgeni men úshin óte qýanyshty jaıt boldy. Búgin men óz daýysymdy bere alamyn jáne elimizdiń damýyna úles qosa alamyn. Biz saılaǵan azamattar Májiliste Qazaqstan halqynyń múddesin qorǵaıdy dep senemin. Jerlesterimdi saılaý ýchaskesine kelip, laıyqty kandıdatqa daýys berýge shaqyramyn», - dedi Rahat Qanybekov.