Buǵan deıingi Olımpıada oıyndarynda Qazaqstan týyn kimder ustap shyqty
ASTANA. KAZINFORM – Búgin Prezıdent HHHІІІ jazǵy Olımpıada oıyndaryna qatysatyn Qazaqstan qurama komandasynyń múshelerimen kezdesip, Parıj Olımpıadasynyń resmı ashylý saltanatynda kók baıraǵymyzdy kóterip shyǵatyn boksshy Aslanbek Shymbergenov pen jeńil atlet Olga Safronovaǵa kókbaıraǵymyzdy tabystady.
Osy oraıda osyǵan deıingi Jazǵy Olımpıada oıyndarynda Qazaqstan týyn kimder alyp shyqqanyn taǵy bir márte eske túsirip, qysqasha sholý jasaǵandy jón kórdik.
Qazaqstannyń táýelsiz el retinde qatysqan alǵashqy jazǵy Olımpıadasy 1996 jyly AQSh-tyń Atlanta qalasynda ótken edi. Onda jambyldyq jas boksshy Ermahan Ibraımov tý alyp shyqty.
Osy baıraqty básekede Ibraımov «qola» júlde jeńip aldy. Jalpy esepte Qazaqstan 11 medalmen 197 el arasynda 24-orynǵa turaqtady.
4 jyldan keıin Aýstralııanyń Sıdneı qalasynda ótken kezekti Olımpıadada da Ermahan Ibraımov taǵy da elimizdiń baıraǵyn jelbiretip shyqty. Bul joly dańqty boksshy el qorjynyna altyn medal syılady. Osylaısha, Ibraımov – Qazaqstanda eki Olımpıadada Qazaqstan týyn kóterip shyǵyp, ekeýinde de júldemen oralǵan jalǵyz sportshy retinde Qazaqstan tarıhynda esimi altyn áriptermen jazylyp qaldy.
Sıdneıde Qazaqstan Olımpıada nátıjesi boıynsha 199 memleket arasynan 22-orynǵa kóterildi.
2004 jylǵy Olımpıada oıyndarynda Qazaqstan týyn dzıýdoshy Ashat Jitkeev alyp shyqqan bolatyn. Atalǵan Olımpıadada ol 7-oryn alyp, júldege ilige almady. Jalpy Qazaqstannyń nátıjesi tómen bolyp, 201 eldiń arasynda 40-orynnan kórindi. Degenmen, Jitkeev 2008 jyly Beıjiń Olımpıadasynda kúmis júldege qol jetkizdi. Bul – Qazaqstannyń dzıýdo baǵytyndaǵy alǵashqy Olımpıada medali boldy.
2008 jylǵy Beıjiń Olımpıadasynda Qazaqstan týyn alyp shyǵý mártebesi aýyr atletıkadan Azııa chempıony Baqyt Ahmetovke berildi. Baqyt Ahmetov Sıdneı Olımpıadasynda 15-shi oryn, Afına Olımpıadasynda – 7-oryn alǵan edi. Beıjiń oıyndarynda 415 keli nátıjemen 5-oryn aldy.
2012 jyly Londonda ótken Olımpıada oıyndarynda elimizdiń kók baıraǵyn grek-rım kúresiniń balýany, Azııanyń eki dúrkin chempıony Nurmahan Tinálıev ustap shyqty.
Alaıda jarys jolyn 1/8 fınaldan bastaǵan N. Tinálıev shvetsııalyq Eýren Iohannan jeńilip qaldy.
2016 jyly Rıo-de-Janeıro qalasynda ótken HHHІ jazǵy olımpıadada Qazaqstan týyn 20 jastaǵy taekvondoshy Rýslan Japarov alyp shyqty. Alaıda sportshy alǵashqy aınalymda ázerbaıjandyq qarsylasy Radık Isaevtan 11:2 esebimen jeńildi. Jubanysh kezdesýindegi jekpe-jekte te otandasymyz 29 jastaǵy ońtústikkoreıalyq Chha Don Mınnen jeńilip qaldy.
2020 jylǵy (2021 jyl) Tokıo Olımpıadasynda elimizdiń kókbaıraǵyn Prezıdent Qasym-Jomart Toqaev alǵash ret eki birdeı tý ustaýshyǵa tapsyrdy. Atap aıtsaq, jeńil atletıkadan Olımpıada chempıony Olga Rypakova men bokstan álem chempıonatynyń kúmis júldegeri Qamshybek Qońqabaevqa tabystaǵan bolatyn.
Mine, endi Frantsııa astanasy parıj qalasynda ótetin HHHІІІ jazǵy Olımpıada oıyndarynyń saltanatty ashylý rásiminde elimizdiń kók týyn taǵy da eki birdeı sportshymyz alyp shyǵady. Olar - bokstan Qazaqstan ulttyq quramasynyń kapıtany Aslanbek Shymbergenov pen jeńil atlet Olga Safronova.
Esterińizge sala keteıik, Qazaqstan sportshylary búgingi kúnge deıin 25 sport túrinen 80 lıtsenzııa jeńip aldy.
Naqtyraq aıtsaq, boks, dzıýdo, sportttyq gımnastıka, jeńil atletıka, baıdarka men kanoede esý, oqpen atý, semserlesý, grek-rım kúresi, erkin kúres, sadaq atý, stendtik atý, tennıs, veloshosse, júzý, zamanaýı bessaıys, taekvondo, velotrek, batýt gımnastıkasy, badmınton, akademııalyq esý, kórkem gımnastıka, trıatlon, ústel tennısi, quzǵa shyǵý jáne breıkıngten Olımpıada oıyndarynda synǵa túsedi.
Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
