Buǵan deıin áıel quqyqtary men múddesi qorǵalmaǵan edi — advokat
ASTANA. KAZINFORM — Advokat Aıjan Jaýenova Senat maquldaǵan áıel quqyqtary men balalardyń qaýipsizdigin qorǵaýǵa baǵyttalǵan zańǵa pikir bildirdi.
«Bul zańnyń qabyldanýyna Prezıdentimiz tikeleı yqpal jasaǵany belgili. Jalpy, balalardyń zorlyq-zombylyqqa ushyraý problemasy keshe ǵana paıda bolǵan joq. Osy salada júrgenimde sottar kámeletke tolmaǵandarǵa kórsetilgen zorlyq-zombylyq pen zorlaý faktisi boıynsha qylmystyq isti qysqartqan kezderi boldy. Sodan keıin pedofılder qaıta qylmys jasaǵan derekter de kezdesetin. Óıtkeni, sottarda qylmyskerge aýyr jaza taǵaıyndaýǵa múmkindik bolmady. Sebebi ol qylmystyń sanktsııasy aýyr jazaǵa ruqsat bermeı keldi. Al jańa zań ondaı qylmyskerlerge eń joǵary ómir boıy bas bostandyǵynan aıyrý jazasy belgilenip otyr. Elimizdiń bolashaǵy balalar desek, onda memleket balalardyń ómiri men densaýlyǵyn saqtap qalýǵa baryn salýy kerek. Qoǵamda balalarynyń amandyǵyn oılap ýaıymdaıtyn, eshqaıda jibermeı otyratyn ata analar kóbeıdi. Balanyń qaýipsizdigine sene almaımyz», — dedi ol agenttik tilshisine bergen pikirinde.
Onyń aıtýynsha, bul zańnyń qabyldanýy durys qadam boldy. Degenmen, basqa da jumystar qolǵa alynýy tıis. Tek jazamen qorqytý arqyly túıindelgen máseleni sheshý óte qıyn.
«Bul zań durys ári ýaqytyly qabyldandy dep oılaımyn. Jalpy, mundaı problemalardy sheshý úshin tek memleket qana emes, sonymen birge ár otbasy balalaryna durys tálim-tárbıe berip, otbasylyq qundylyqtardy dáripteý arqyly atsalysýy tıis. Sonda ǵana naqty oń nátıje bolady», — dedi advokat.
Sonymen qatar ol zańda áıelderdiń quqyqtaryn qorǵaýǵa da basa mán berilgenin atap ótti.
«Buǵan deıin áıel quqyqtary men múddesi qorǵalmaǵan edi. Qanshama áıel otbasylyq zorlyq-zombylyq qurbany bolǵany da bizge beımálim. Alaıda, dál osylaı ári qaraı ómir súrý múmkin emes ekeni anyq jaıt. Al Senat maquldaǵan zańdaǵy ózgerister sonyń nátıjesi. Sońǵy 2 jylda otbasylyq zorlyq-zombylyqtan qaza tapqandar sany artqanyn quzyrly organdar aıtyp keledi. Endi mundaı ozbyrlar ákimshilik emes, qylmystyq jaýapkershilikke tartylmaq. Bul zorlyq-zombylyqqa ushyraıtyn áıelder sanyn eselep qysqartatynyna senemin», — dedi Aıjan Jaýenova.
Aıta keteıik, keshe Senattyń jalpy otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańy men ilespe qujat eki oqylymda qaralyp, maquldanǵan edi.
