Budan bylaı aýyldan shyqpaı-aq bankten depozıt ashýǵa bolady

ASTANA. QazAqparat - «Qazaqstan Halyq Banki» AQ men «Qazposhta» AQ arasyndaǵy yntymaqtastyq týraly memorandým aıasynda bank túgili, aýyl ákimdiginiń ǵımaraty joq aýyldarǵa Halyq bankiniń birneshe qyzmet túrleri kórsetiletin boldy, dep habarlaıdy «QazAqparat» HAA tilshisi.

«Qazposhtanyń qyzmetkerleri bank qyzmetterin kórsetý boıynsha oqytylatyn bolady. Buǵan qosa IT mamandar qyzmet túrlerin keńeıtý baǵytynda jumys júrgizedi. Máselen, aýyl turǵyny Qazposhta bólimshesine baryp, IT júıesi arqyly depozıt ashyp, qoryna aqsha toltyra berýge bolatyndaı jaǵdaı jasaýdy kózdeımiz», - deıdi «Qazaqstan Halyq banki» AQ basqarma tóraıymy Úmit Shaıahmetova.

Memorandýmǵa endi ǵana qol qoıylǵandyqtan, eki jaqty jumysty retke keltirýge ýaqyt kerek. Shalǵaıdaǵy aýyl turǵyndaryna Qazposhta bólimsheleri arqyly bank qyzmetin kórsetý jumystary shamamen kúzdiń sońyna qaraı bastalady.

Nesıe alǵysy kelgen aýyl turǵyndary Qazposhta bólimshesine baryp, óz atynan nesıege ótinim bere alatyndaı jaǵdaı jasalmaq. Sondaı-aq, nıet bildirgenderge Qazposhtadan tólemderdi júrgizý, aqsha aýdarý, kredıt berý, ótinim berilgen kartochkalardy jetkizý qyzmetteri kórsetiledi.

Eske sala ketsek, Astanada búgin «Qazaqstan Halyq Banki» AQ men «Qazposhta» AQ arasynda yntymaqtastyq týraly memorandýmǵa qol qoıyldy. «Qazposhta» AQ basqarma tóraǵasy Sáken Sársenov Qazaqstannyń túkpir-túkpirindegi Qazposhtanyń 3500 bólimshesinde bank qyzmetteri kórsetiletinin málim etken.

Aıta keterligi, Qazposhta klıentteriniń 70 protsenti aýyl turǵyndary bolyp tabylady.