Budan bylaı Dýrov Frantsııadan erkin shyǵa alady
ASTANA. KAZINFORM — Telegram messendjeriniń negizin qalaýshy Pavel Dýrovqa Frantsııa aýmaǵynan shyǵýǵa salynǵan shekteý alyndy, endi ol frantsýz polıtsııa bólimine turaqty túrde baryp belgilenip turýǵa mindetti emes, dep habarlaıdy TASS.
TASS-tyń málimetinshe, Pavel Dýrov Frantsııa bıliginen oǵan qatysty elden shyǵý erkindigin shektegen sot baqylaý sharalaryn alyp tastaýdy surap, maqsatyna jetti. Endi kásipkerge elden shyǵýǵa tyıym salynbaıdy jáne ol polıtsııada belgilenip turý mindetinen bosatyldy.
Bul sheshim 10 qarashada qabyldanǵan.
Eske sala ketsek, 2024 jyldyń 24 tamyzynda Pavel Dýrov Parıjdiń Le-Býrje áýejaıynda ustalǵan bolatyn. Oǵan taǵylǵan aıyptardyń biri — qylmystyq top quramynda zańsyz qarjy operatsııalaryn júrgizý maqsatynda ınternet platformany basqarýǵa qatysqan degen kúdik.
Parıj prokýratýrasynyń málimetinshe, mundaı quqyqbuzýshylyq úshin 10 jylǵa deıin bas bostandyǵynan aıyrý jáne 500 myń eýro kóleminde aıyppul salý jazasy qarastyrylǵan.
Tergeý sýdıasynyń sheshimimen kásipkerge 5 mıllıon eýro kepil qoıý jáne aptasyna eki ret polıtsııaǵa kelip belgilenip turý talaby júktelgen. Sondaı-aq Frantsııa aýmaǵynan shyǵýǵa tyıym salynǵan bolatyn.
Buǵan deıin Pavel Dýrov óziniń ustalýyn frantsýz polıtsııasynyń qatesi dep ataǵan edi.
Eske salsaq, qazan aıynda Digital Bridge 2025 halyqaralyq forýmynyń alańynda Qasym-Jomart Toqaev Telegram messendjeriniń negizin qalaýshy Pavel Dýrovpen kezdesti.
Digital Bridge forýmynda Pavel Dýrov Qazaqstanda JI-zerthanasy ashylǵanyn habarlady.
Sonymen qosa Pavel Dýrov Astanada startapshylar baıqaýynda qazylyq etti.