Bishkekte Kólbaevtyń uıymdasqan qylmystyq tobynyń taǵy bir múshesi ustaldy
BІShKEK. KAZINFORM – Bishkekte Qamshy Kólbaevtyń (Qamshybek Asanbek) uıymdasqan qylmystyq tobynyń Danıla laqap esimdi múshesi ustaldy, dep habarlady Kabar aqparat agenttigi.
Polıtseılerdiń málimetinshe, kúdiktiniń qolynda belgisiz markaly qarý bolǵany týraly aqparat túsken. Atalǵan fakti boıynsha Pervomaıskıı aýdandyq ІІB tergeý qyzmeti Qyrǵyz Respýblıkasy Qylmystyq kodeksiniń 267 baby (qarý, oq-dárilerdi zańsyz satý) boıynsha qylmystyq is qozǵady.
Osylaısha, Qamshy Kólbaevtyń uıymdasqan qylmystyq tobynyń belsendi múshesi retinde Іshki ister mınıstrliginde tirkelgen kúdikti S.D. anyqtalyp, ustaldy. Ol 1976 jyly týǵan, laqap aty – Danıla. Ol tergeý qyzmetine jetkizilip, Qylmystyq-protsessýaldyq kodekstiń 96-babyna sáıkes ýaqytsha ustaý abaqtysyna qamaldy.
Polıtsııa qyzmetkerleri kúdikti S.D.-nyń buryn adam urlaý jáne tonaý úshin birneshe ret sottalǵanyn anyqtady. Kezinde ol Asanbek Qamshynyń jaqyn da adal serikteriniń biri, júrgizýshisi, kúzetshisi bolǵan. Uıymdasqan qylmystyq toptarǵa qarsy júrgizilip jatqan kúreske qaramastan, ol qylmystyq urylar ıdeologııasyn qoldaýdy jalǵastyrdy, túrmedegi adamdardy belsendi túrde qarjylaı jáne azyq-túlikpen qamtamasyz etti.
Qylmystyq is aıasyndaǵy jedel-izdestirý sharalary barysynda kúdiktiden nómiri óshirilgen 9 mm-lik Makarov markaly qarý, 1 dana oq-dári jáne 8 patron tabylyp, tárkilendi.
Eske sala ketsek, qylmys áleminiń serkesi Qamshy Asanbek (Qamshybek Kólbaev) Bishkekte tutqyndalý kezinde kózi joıyldy.
