Brıýsselde taǵy da atys boldy

ASTANA. KAZINFORM – 17 aqpanda skýter mingen qarýly erkek Brıýssel óńirindegi Anderleht kommýnasyndaǵy metro stansasynda er adamnyń aıaǵyna oq atyp, jaralaǵan.

Bul Eýropa astanasynyń osy aımaǵynda sońǵy aptalarda oryn alǵan birinshi oqıǵa emes.

Polıtsııa buǵan jergilikti esirtki satýshylar arasyndaǵy qarýly qaqtyǵys sebep deıdi.

- Bul joly bir adam aıaǵynan jaraqat aldy, dep habarlaıdy Bruzz.

Sodan keıin qaskúnem skýterge otyryp qashyp ketken. Oqıǵa ornyna saǵat 23:25 shamasynda polıtsııa shaqyrylǵan.

Jábirlenýshige medıtsınalyq kómek kórsetilip, jaýap alyndy. Sondaı-aq birneshe kýáger de anyqtaldy. Oqıǵa ornyna sarapshy men sot-tergeýshiler kelgen. Tergeý jalǵasyp jatyr.

Aqpan aıynyń basynan beri Anderleht kommýnasynda esirtki toptary arasyndaǵy qaqtyǵys saldarynan eki adam qaza tapty.

Aqpannyń 5-i kúni tańǵy saǵat altylar shamasynda Klemanso metro stantsııasynda eki er adam Kalashnıkov avtomatynan oq jaýdyrǵan. Eshkim zardap shekken joq.

Kelesi kúni túngi saǵat úsh jarym shamasynda Klemanso mańynda taǵy da oq atyldy. Bul joly ótip bara jatqan adam aıaǵynan jaraqat alǵan.

7 aqpanda tańǵy saǵat 4-ter shamasynda Pıterbos aýdanynda atys bolyp, bir adam qaza tapqan.

Eske salaıyq, 15 aqpan kúni saǵat 21:30 shamasynda «Klemanso» metro stansasynda atys bolyp, 19 jastaǵy jas jigit mert bolǵan, qylmysker qashyp úlgergen.