Bronhıtten koronavırýsty qalaı ajyratýǵa bolady

ALMATY. QazAqparat - №11 qalalyq emhanasynyń jalpy tájirıbeli dárigerler bólimshesiniń meńgerýshisi Ardaq Moldahanova QazAqparat tilshisine bronhıtten koronavırýsty qalaı ajyratýǵa bolatynyn aıtty.

Dárigerdiń aıtýynsha, koronavırýsqa shaldyqqan adamdarda ıis sezýdiń buzylýy nemese tolyq joǵalýy jıi kezdesedi. Sonymen qatar, dene qyzýy 37-38 gradýsqa deıin kóteriledi.

Spıker bronhıtten koronavırýsty qalaı ajyratýǵa bolatynyn tilge tıek etti.

«Jedel bronhıtta qaqyryq bólinýi múmkin «keýde» jótelimen erekshelenedi. Sýyq tııýge tán jalpy belgiler bolýy múmkin: qyzba, álsizdik, mazasyzdyq, tábettiń tómendeýi jáne ıntoksıkatsııanyń basqa belgileri. Ádette, jedel bronhıttiń uzaqtyǵy eki-úsh aptadan aspaıdy», – dedi Ardaq Moldahanova.

Dáriger jedel bronhıt bronhopnevmonııa túrindegi asqynýdy týdyrýy múmkin ekenin túsindirdi, bul ókpege áser etetin ınfektsııalyq jáne qabyný úderisi, qyzba, qurǵaq jótel jáne jalpy álsizdik týdyrady.

Sozylmaly bronhıttiń baqylanbaıtyn progressııasy turaqty jedel pnevmonııaǵa ákeledi jáne aqyrynda obstrýktıvti ókpe aýrýyna aınalady.

«Sonymen qatar, tynys alý joldarynyń shyryshty qabaty isinip, ókpe tinderi jartylaı buzylady. Sondaı-aq sozylmaly bronhıt ókpe gıpertenzııasynyń, júrek-ókpe jetkiliksizdiginiń, emfızemanyń, bronhoektazdyń, pnevmonııanyń jáne basqa da birqatar qaýipti aýrýlardyń damýyna sebep bolýy múmkin», - dep qosty ol.