Bronh-ókpe patologııasy barlar qaı sanatorııge bara alady

ASTANA. QazAqparat – Densaýlyq saqtaý mınıstrligi sanatorıı men kýrortqa kimder tegin bara alatynyn túsindirdi, dep habarlaıdy QazAqparat tilshisi.

«Sanatorıı-kýrorttyq emdeý – bul medıtsınalyq ońaltýdyń úshinshi kezeńinde usynylatyn saýyqtyrý túri. Medıtsınalyq ońaltýdyń úshinshi kezeńi saýyqtyrýdy qajet etetin jaǵdaılarda eskerilgen. Bul rette, Medıtsınalyq-sanıtarlyq alǵashqy kómek (MSAK) uıymdarynda, kúndizgi statsıonarlarda, ońaltý ortalyqtarynda, sanatorıı-kýrorttyq uıymdarda Tegin medıtsınalyq kómektiń kepildendirilgen kólemi (TMKKK) jáne Mindetti áleýmettik medıtsınalyq saqtandyrý (MÁMS) júıesi aıasynda, onyń ishinde qashyqtan medıtsınalyq qyzmet kórsetý arqyly usynylady», - delingen Densaýlyq saqtaý mınıstrligi málimetinde.

Atalǵan vedomstvo qaramaǵynda Kýrortologııa jáne medıtsınalyq ońaltýdyń ǵylymı zertteý ınstıtýty (Býrabaıda) bar, onda bronh-ókpe patologııasy bar patsıentter medıtsınalyq ońaltýdan ótedi.

«Kóbine sanatorıı-kýrorttyq uıymdar jeke mekeme retinde qurylǵan. Elimizde 170-ke jýyq uıym bar. Joldama alý úshin patsıent emhanadaǵy ýchaskelik dárigerde nemese tirkelgen jeri boıynsha jalpy praktıka dárigerinde bronh-ókpe júıesiniń aýrýlary boıynsha dınamıkalyq baqylaýda bolýy tıis. Osydan keıin adamdar Býrabaıdaǵy Kýrortologııa jáne medıtsınalyq ońaltý ǴZI-ǵa jiberiledi», - dep atalyp ótken mınıstrlik jaýabynda.

Budan buryn habarlanǵandaı, sanatorııler men kýrorttarǵa em alýǵa jiberilmeıtin arýlardyń tizimi bekitilmek.