Birinshi kýrs stýdentteriniń stıpendııasy keshigip túsetin boldy

ASTANA. KAZINFORM — «Qarjy ortalyǵy» aktsıonerlik qoǵamy stýdentterge eskertý jasady. 

Qarjy ortalyǵy 2024-2025 oqý jylynyń birinshi semestriniń 1-kýrsynda bilim alýshylarǵa bıylǵy qyrkúıek aıynyń memlekettik stıpendııasy 2008 jylǵy 7 aqpandaǵy № 116 QR Úkimeti qaýlysymen bekitilgen qaǵıdaǵa sáıkes 30 qyrkúıektegi jaǵdaı boıynsha JJOKBU esepterin teksergennen keıin qazan aıynyń ishinde tólenetinin habarlady. 

«Sondaı-aq, jańadan túsken medıtsınalyq joǵary oqý oryndarynyń birinshi kýrs stýdentterine qyrkúıek aıynyń stıpendııasy qazan aıynda eki aıǵa (qyrkúıek-qazan) qosylyp tólenetinin eske salamyz. Tólemder aıdyń aıaǵynda (qazanda) jasalady. Aýyspaly kýrs stýdentteriniń kontıngentine (barlyq basqa stýdentterge) qyrkúıek aıynyń memlekettik stıpendııasyn tóleý JJOKBU usynǵan esepterge sáıkes júzege asady, ıaǵnı stıpendııa qyrkúıek aıynyń sońyna deıin túsedi» deıdi uıymnyń baspasóz qyzmetinen.

Aıta keteıik, bıylǵy oqý jylynan bastap stýdentterdiń stıpendııasy ósken bolatyn. 

Kolledj stýdentteri úshin shákirtaqy 50%-ǵa artyp, jumysshy mamandyqtaryna — 43 574 teńge, orta býyn mamandary úshin — 41 896 teńge boldy.

Bakalavrıat stýdentteriniń stıpendııasy 20%-ǵa artyp, 47 135 teńgege deıin, al pedagogıka jáne medıtsına baǵyttaryndaǵy bilim alýshylardyń stıpendııasy 75 600 teńgege deıin ulǵaıdy.