Birneshe gúl ósiretin ferma ashýdy armandaımyn – atyraýyq Ásemgúl Saparova

ATYRAÝ. KAZINFORM – Atyraý qalasynda turatyn erli-zaıypty Nurjigit Rahymjanov pen Ásemgúl Saparova qyzǵaldaq ósirýdi otbasylyq bızneske aınaldyrdy. Olar bul kásipti 4 jyl buryn bastaǵan. Qazir 6 adamdy jumyspen qamtyp otyr.

Әсемгүл Сапрова
Фото: Әсемгүл Сапарованың жеке архивінен

– Ásemgúl, qyzǵaldaqty ósirý ıdeıasy neden týyndady?

– Kúıeýim jyl saıyn 8 naýryzda anasyna, jeńgelerine, qaryndastaryna gúl syılaıdy. Gúl satyp alý úshin dúkenderdi jıi aralaımyz ǵoı. Sol kezde ásirese qyzǵaldaqqa suranystyń joǵary ekenin baıqadyq. Bizde satylatyn gúldiń deni, onyń ishinde qyzǵaldaq ta Gollandııadan ákelinetin bildik. Ol «Shetelden tasymaldanyp jatqan qyzǵaldaqty ózimiz nege ósirmeımiz?» dep ıdeıasyn usyndy. Biraq ony iske asyrý ońaı bolǵan joq. Qyzǵaldaqty ósirýdiń qandaı tásili bar? Ony qalaı kútý qajet? Mine, osyndaı saýaldarǵa jaýap izdedik.

  gúl ósirý
Foto: Ásemgúl Saparovanyń jeke arhıvinen

– Qyzǵaldaqty qaıda ósiresizder? Eń kóp qyzǵaldaq qaı jyly shyqty?

– Biz qyzǵaldaqty ósirýdi 4 jyl buryn bastaǵan edik. Ózimizdiń kólik garajymyz bar edi. Soǵan qyzǵaldyqtyń tuqymyn ektik. Árıne, bastapqyda qobaljyǵanymyz ras. Óıtkeni buryn gúl ósirip kórmegendikten, alańdaýshylyǵymyz basym boldy. Biraq sol jyly 5 myń qyzǵaldaq aldyq. Bul – bizdiń alǵashqy tájirıbemiz. Alǵashqy nátıjege qol jetkizgen soń osy isti otbasylyq bızneske aınaldyrýdy kózdedik.

jylyjaı
Foto: Ásemgúl Saparovanyń jeke arhıvinen

Qazir qyzǵaldaqty jylyjaıda ósiremiz. Bıyl 29 myńnan astam qyzǵaldaq ósirdik. Muny gúl bıznesindegi jetistigimiz deýge bolady.

– Gúl ósirý úshin qandaı talaptar saqtalýy kerek?

– Shynymdy aıtsam, gúl ósirý ońaı emes. Bul – úlken táýekeldi talap etetin kásip. Shyǵyny da kóp bolýy múmkin. Sol sebepten, shyǵynǵa batpaý úshin birneshe talapty qatań saqtaǵan jón. Birinshiden, qyzǵaldaqtyń túpterin 5-9°C tómen temperatýrada saqtaımyz. Sodan keıin 16-18°C aralyǵyndaǵy jyly temperatýraǵa aýystyramyz.

gúl
Foto: Ásemgúl Saparovanyń jeke arhıvinen

Ekinshiden, sabaǵy shirip ketpeýine mán beremiz. Bul úshin topyraqtaǵy ylǵaldy udaıy qadaǵalap otyramyz. Topyraqtyń qunarlysyn tańdaımyz.

Úshinshiden, jaryq udaıy túsip turýy qajet. Qys aılarynda qosymsha jaryqtandyrý tehnologııasyn qoldanamyz.

– Budan basqa qolǵa alǵan kásip túri bar ma?

– Tek qyzǵadaq ósirýmen shektelgimiz kelmedi. Sóıtip, 2022 Mahambet aýdanynyń Jalǵansaı aýyldyq okrýginde 1 gektarǵa 17 myń túp qulpynaı ekken edik. Bul – qulpynaıdyń sýyqqa da, ystyqqa da tózimdi túri.

qyzǵaldaq
Foto: Ásemgúl Saparovanyń jeke arhıvinen

Aldymen qulpynaıdy ósirý ádisin zerttedik. Gollandııanyń, Italııanyń mamandarymen sóılesip, tuqym túrleriniń sapasyn salystyrdyq. Qazir ıtalııalyq «Kleır» jáne kalıfornııalyq «Albıon» dep atalatyn qulpynaıdy ósiremiz. Qulpynaıdyń bul túrleri ári kólemdi, ári dámdi, bizdiń óńirdiń aýa raıyna tózimdiligimen erekshelenedi. «Kleır» jemisti kóktemde beredi. Al «Albıonnan» erte kóktemnen qarashaǵa deıin ónim alýǵa bolady.

Bıyl 5 tonna qulpynaı alýymyz kerek. Buǵan qosa 2 myńǵa jýyq qulpynaı alatyn bolarmyz.

– Alda iske asyrýdy kózdegen qandaı josparyńyz bar?

– Qyzǵaldaq ósirýden aıtarlyqtaı tájirıbe jınadyq. Endi birneshe gúl ósiretin ferma ashqymyz keledi. Osy oıymyz iske assa, túımedaq, gladıolýs, snapdragon, lızıantýs, gıatsınt, nartsıss sekildi gúlderdi ósirýdi josparlap otyrmyz. Bul – bizdiń otbasylyq armanymyz. Osyndaı ádemi gúlderdi ósirip, atyraýlyqtarǵa tek kóktemde ǵana emes, jyldyń tórt mezgilinde usynýdy oılastyryp júrmiz.

Eske sala ketelik, buǵan deıin Prezıdentpen kezdesken atyraýlyq Bahytgúl Sanqybaeva qarapaıym jumysshylarǵa qoldaýdy sezingenin aıtqan edi.

qyzǵaldaq
Foto: Ásemgúl Saparovanyń jeke arhıvinen

 

 

Сейчас читают