Kepildendirilgen tegin medıtsınalyq kómektiń birqatary endi saqtandyrý esebinen kórsetiledi

ASTANA. KAZINFORM – Tegin medıtsınalyq kómektiń kepildendirilgen kólemi (TMKKK) paketindegi aýrýlardyń bir bóligi mindetti áleýmettik medıtsınalyq saqtandyrý júıesine (MÁMS) aýystyrylady. Densaýlyq saqtaý mınıstri Aqmaral Álnazarova muny qyrkúıekte Úkimet úıinde ótken baspasóz máslıhatynda málim etken bolatyn. Bul ne úshin qajet? Qanshalyqty tıimdi jáne qashan júzege asyrylady? Osy ózge de suraqtarǵa jaýap izdep kórgen edik.

Medıtsınalyq kómektiń biryńǵaı paketin qalyptastyrý

Elimizde 2020 jyldan bastap mindetti áleýmettik medıtsınalyq saqtandyrý júıesi engizildi. Júıe medıtsınalyq qyzmetterdi 2 kózden – respýblıkalyq bıýdjetten tegin medıtsınalyq kómektiń kepildendirilgen kólemi (TMKKK) jáne mindetti áleýmettik medıtsınalyq saqtandyrý (MÁMS) aktıvterinen qarjylandyrý kózdelgen. Osylaısha, medıtsınalyq qyzmettiń 2 paketi (TMKKK jáne MÁMS) quryldy.

«Qarjylandyrý kózin anyqtaýdyń negizgi krıterııleri aýrýlar tizimi boıynsha jasaldy, biraq birqatar qyzmet 2 pakette de qaıtalandy. Qarjylandyrýdyń bul túri medıtsınalyq uıymdardyń mamandary úshin de, patsıentter úshin de qolaısyzdyqtar týǵyzdy. Sonymen qatar, ártúrli kózden qarjylandyrýda patsıenttiń saqtandyrylǵan tulǵa retinde nemese TMKKK sheńberinde qandaı mártebege ıe bolatyndyǵy túsiniksiz, ıaǵnı statsıonarda emdelgen jaǵdaıda, konsýltatsııalyq-dıagnostıkalyq qyzmetter men skrınıngtik zertteýler kezinde. Búginde onkoskrınıngterdiń birinshi kezeńi TMKKK esebinen, al ekinshi kezeńi MÁMS júıesi arqyly qarjylandyrylady. Demek, patsıent saqtandyrylmaǵan jaǵdaıda skrınıngtiń 2-kezeńi boıynsha qyzmet ala almaıdy, bul nysanaly topty onkoskrınıngtermen qamtýdyń 30%-ǵa deıin tómendeýine ákeldi», - dep túsindirdi Densaýlyq saqtaý mınıstrliginen.

Sonymen qatar COVID-19 pandemııasy kezinde respýblıkalyq bıýdjetke túsetin aýyr júktemege baılanysty tegin medıtsınalyq kómektiń kepildendirilgen kólemi qyzmetiniń bir bóligi MÁMS-ke aýystyryldy.

Búginde balalar, júkti áıelder, zeınetkerler, stýdentter, múgedektigi bar jandar, jumyssyzdar, taǵy osy sııaqty barlyǵy 15 sanat boıynsha halyq saqtandyrý jarnasyn tólep jatyr. Bul degenimiz – bul sanattaǵylardy memleket qorǵaıdy jáne olar saqtandyrý mártebesine qaramastan medıtsınalyq kómekpen qamtylady. Jalpy 17 mln qazaqtandyq nemese halyqtyń 83%-y medıtsınalyq saqtandyrý mártebesine ıe.

TMKKK jáne MÁMS qataryn tolyqtyrý ne úshin qajet?

Qos medıtsınalyq paket qyzmetin ońtaılandyrýdaǵy maqsat – qaıtalaýdy boldyrmaý jáne ashyqtyqty qamtý. Sonymen qatar patsıenttiń saqtandyrý mártebesine qaramastan halyqqa bazalyq kómektiń qoljetimdiligine kepildik berýge múmkindik beredi.

«Mindettemelerdiń negizgi bóligi densaýlyq úshin ortaq jaýapkershilik qaǵıdattarynda saqtandyrý esebinen oryndalady. Bul tásil patsıentterdiń dárigerdiń nusqaýlyǵyn saqtaýǵa, salaýatty ómir saltyn ustanýǵa jáne sozylmaly dertke shaldyqqan naýqastardy baqylaýdy yntalandyrady dep sanaımyz. MÁMS júıesine azamattardyń qatysýyn eskere otyryp, áleýmettik osal toptaǵy jáne sozylmaly aýrýlary bar patsıentterdi medıtsınalyq kómekpen qamtý - búginde shamamen 85% jáne 2027 jyly bul kórsetkish 98%-ǵa deıin ulǵaıady degen boljam bar. Medıtsınalyq kómektiń qoljetimdiligi bóliginde túbegeıli eshteńe ózgermeıdi», - deıdi mınıstrlikten.

Sonymen qatar Densaýlyq saqtaý mınıstrligi medıtsınalyq kómek júıesin jetildirý sheńberinde saqtandyrý mártebesine qaramastan memlekettik bıýdjet esebinen sozylmaly aýrýlardy dıagnostıkalaý jáne emdeý úshin qajetti qyzmetti kózdeıtin medıtsınalyq kómek kepildikteriniń bazalyq paketin qaıta qarady.

Patsıent eskeretin jaıttar 

Memleket basshysy halyqqa joldaýynda medıtsınalyq qyzmetterdiń qoljetimdiligin ári ashyqtyǵyn qamtamasyz etetin biryńǵaı júıe qalyptastyrýǵa basa nazar aýdardy. Biryńǵaı medıtsınalyq kómek paketi densaýlyq saqtaý júıesindegi memlekettik kepildikti naqty aıqyndaıdy.

2025 jyldan bastap tegin medıtsınalyq kómektiń kepildendirilgen kólemi jáne mindetti áleýmettik medıtsınalyq saqtandyrý qyzmetin ońtaılandyrý kezeń-kezeńimen júzege asyrylady.

2025 jyly barlyq 13 áleýmettik mańyzy bar aýrýdy TMKKK júıesinde emdeý qalady. Onyń qatarynda:

• táýlik boıy jáne kúndizgi statsıonar
• dınamıkalyq baqylaý
• ambýlatorııalyq dári-dármekpen qamtamasyz etý (týberkýlez, psıhıatrııa/narkologııa, onkologııa, onkogematologııa)
• AITV\JITS, júıke júıesiniń degeneratıvti aýrýlary, ortalyq júıke júıesiniń demıelınızatsııalyq aýrýlary, tserebraldy sal aýrýy, orfandyq aýrýlar, jedel mıokard ınfarktisi, revmatızm, endokrındik júıeniń aýrýlary, tamaqtanýdyń buzylýy jáne metabolıkalyq buzylýlar, dáneker tinniń júıeli zaqymdanýy, baýyr tsırrozy bar sozylmaly vırýstyq gepatıt) aýrýlar.

Sol sııaqty dınamıkalyq baqylaýǵa jatatyn aýrýlardyń 9 toby:

1. Arıtmııa
2. atrıaldy fıbrıllıatsııa jáne dirildeý
3. arterııalyq gıpertenzııa
4. tómengi tynys joldarynyń sozylmaly aýrýlary
5. glomerýlıarlyq aýrýlar
6. brahıotsefalııalyq arterııalardyń ekstrakranıaldy aýrýlary
7. júrektiń ıshemııalyq aýrýy
8. sozylmaly ınterstıtsıaldy nefrıt
9. dáneker tininiń júıelik zaqymdanýy, júrek klapandarynyń zaqymdanýy, epılepsııa) TMKKK júıesinde qalady.

Sondaı-aq, TMKKK júıesi aıasynda:

• jedel medıtsınalyq kómek
• juqpaly aýrýlardy emdeý
• ambýlatorııalyq dıalız
• shuǵyl jaǵdaılarda emdeý
• shetelde emdeý
• qan preparattarymen qamtamasyz etý
• pallıatıvtik kómek
• meıirbıkelik kútim
• patologııalyq-anatomııalyq dıagnostıka
• saqtandyrylmaǵandar úshin shuǵyl statsıonarlyq kómek burynǵydaı kórsetiledi.

2025 jyldan bastap Densaýlyq saqtaý mınıstrliginiń bastamasy boıynsha barlyq onkoskrınıng TMKKK paketinde qoljetimdi bolady (qazir «Halyq densaýlyǵy jáne densaýlyq saqtaý júıesi týraly» kodeksine ózgerister engizý boıynsha jumys júrgizilip jatyr).

2025 jyldan bastap medıtsınalyq saqtandyrýy bar azamattar úshin alǵash engiziletin qyzmetter:

• jedel tserebrovaskýlıarlyq buzylystardy erte dıagnostıkalaý jáne aldyn alý úshin brahıotsefalııalyq tamyrlardyń ýltradybystyq zertteýi
• júrek tamyrlarynyń zaqymdanýyn erte dıagnostıkalaý jáne mıokard ınfarktisiniń aldyn alý úshin ambýlatorııalyq koronarografııa.

2025 jyldan bastap tegin medıtsınalyq kómektiń kepildendirilgen kólemi júıesinen MÁMS paketine aýystyrylatyn aýrý túrleri:

• artropatııa, dorsopatııa, baýyr aýrýlary, qalqansha beziniń aýrýlary, perınataldyq kezeńde paıda bolǵan bronh-ókpe dısplazııasy, týa bitken damý aqaýlary, operatsııadan keıingi kezeńde týa bitken júrek aqaýlary, qýyq asty beziniń gıperplazııasy, sút beziniń qatersiz dısplazııasy, asqazan-ishek joldarynyń joǵarǵy bóliginiń aýrýlary, qan jáne qan túzýshi organdardyń aýrýlary, áıel jynys músheleriniń qabynbaıtyn aýrýlary, ınfektsııalyq emes enterıt jáne kolıt.

«Taldaý qorytyndysyna sáıkes, osy sanatqa jatatyn patsıentter negizinen saqtandyrylǵan. Olar - balalar, júkti áıelder, múgedektigi bar jandar jáne jumys isteıtin azamattar», - dep túsindirdi mınıstrlikten.

2026 jyldan bastap 13 áleýmettik mańyzy bar dertke kúdik týyndaǵan jaǵdaıda tegin konsýltatsııalyq-dıagnostıkalyq kómek kórsetý josparlanyp otyr. Búginde 13 júrek-qan tamyrlary aýrýlary, týberkýlez jáne AITV ınfektsııasy boıynsha dıagnostıka jasaý TMKKK sheńberinde júrgiziledi, qalǵan 11 aýrýdyń dıagnostıkasy MÁMS júıesi aıasynda júzege asyrylady.

Buǵan deıin habarlanǵanyndaı, Qarjy mınıstri Mádı Takıev 2025 jyly Áleýmettik medıtsınalyq saqtandyrý qoryna 675 mlrd teńge baǵyttalatynyn málim etken bolatyn.