Brıtanııada Ulystyń uly kúni merekesi atalyp ótti
GILFORD. KAZINFORM — Tumandy Albıonda turatyn qandastarymyz ben jergilikti halyq birigip Naýryz meıramyn atap ótti, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Bul kúni qazannyń janynda qyzý tirlik qaınap jatty. Uıymdastyrýshylar taǵamnyń dám-tuzyn keltirip, júgirip júr. Palaýdyń kúrishin baptaýǵa bilek sybana kirisken aspazdardyń biri Serik, shyn aty Stıven. Kezinde Qazaqstanda jumys istep, qazir zeınetke shyqqan.
“Ádette, Atyraýdaǵy Teńiz munaı-gaz ken ornynda Naýryz toılaıtynbyz. Bıyl osynda atap ótip jatyrmyz. Maǵan qazaqtyń mádenıeti jáne taǵamdary unaıdy. Mýzykasyn jáne bılerin jaqsy kóremin”, - deıdi zeınetker Stıven Baklend.
Shara bastalmas buryn ánuran oryndaldy. Elden jyraqta júrgen qandastarymyz júrek tusyna oń qoldaryn qoıyp, án shyrqap, elge degen qurmetterin kórsetti.
Bul kúni palaýdan bólek úlken as ta tartyldy. Qazaqstannan jetken jylqynyń eti men qazy-qarta, qurt pen jent dastarhandy jaınatyp jiberdi. As-aýqat jep, túıilgenderge sorpa berildi. “Jıǵan-tergeniń toıǵa shashylsyn” degen sózdi jadyna túıgen qazaqtar shashý shashýdy da umytpady.
“Men osy Anglııada turyp jatqanyma 17 jyl boldy. Naýryz merekesin uıymdastyryp júrgenimizge 8 jyl boldy. Búgin 120-daı eresek adam keldi, 70-teı bala jınaldy. Óte jaqsy ótkizip jatyrmyz”, - deıdi uıymdastyrýshylardyń biri Almash Álıeva.
“Anglııa eline joldasymmen jáne kishkentaı balamyzben 7 jyl buryn kóship kelgenbiz. Naýryz toıyn merekeleýdegi maqsatymyz osyndaǵy qazaqtardyń basyn qosyp, balalarymyzdy bir-birimen tanystyrý”, - deıdi taǵy bir uıymdastyrýshy Botagóz Nıl.
Sahnaǵa ata-analar balalarymen birge shyǵyp, óner kórsetti. Biri dombyra, endi biri qobyz tartty. Kópshiligi ulttyq aspaptardy Qazaqstandaǵy muǵalimderden onlaın úırengen.
“Kóktemniń osyndaı keremet kúninde qazaqtardyń basy qosylyp, jınalyp jatqany bárimizdi qýantady. Keremet shara dep oılaımyn. Jyl saıyn ótkizilip jatyr. Ortamyz jyldan jylǵa tolyp, sheteldikter de qosylyp jatyr”, - deıdi Ulybrıtanııadaǵy Qazaq ortalyǵynyń dırektory Kámshat Kúmisbaı.
Bárinen de kishkentaılar rıza. Uıada ne kórse, ushqanda sony iletin balalardyń ultjandy bolyp ósip jatqany ańǵarylady. Ata-analar arqan tartyp, jarysqannan keıin ul-qyzdary da ulttyq oıyndy jalǵastyrdy. Olarǵa brıtanııalyq balalar da qosyldy.
“Eshkim aýyrmasyn, densaýlyq zor bolsyn jáne beıbitshilik bolsyn”, - deıdi oqýshy qyz Amelı Skott.
“Árbir otbasyna birlik pen qýanysh, qut-bereke, baqyt pen molshylyq ákelsin”, - deıdi taǵy bir oqýshy qyz Altynshash Dıproýz.
Ulybrıtanııada beıresmı derekterge sáıkes 10 myńǵa jýyq qazaq turady. Stýdenttermen qatar, otbasylyq jaǵdaıymen nemese jumys babymen ómir súrip jatqan otandastarymyz kóp.
