Brıtandyqtardyń tórtten bir bóligi kedeıshilikte ómir súredi

ASTANA.KAZINFORM — Ulybrıtanııanyń áleýmettik kórsetkishter jónindegi komıssııasynyń (SMC) esebine sáıkes, Ulybrıtanııadaǵy balalardyń úshten biri men eresekterdiń tórtten biri kedeılik sheginen tómen ómir súredi, dep habarlaıdy Kazinform agenttiginiń menshikti tilshisi. 

Qujat avtorlary eldegi kedeılik deńgeıi HHІ ǵasyrdaǵy rekordtyq deńgeıge jetkenin atap ótti. 2019 jyldan bastap ómir súrý qunynyń ósýi jaǵdaıdy nasharlatyp, qosymsha 2,1 mıllıon brıtandyqqa áser etti.

Búgingi tańda elde 16 mıllıon brıtandyq kedeılik jaǵdaıynda ómir súrip jatyr. Olardyń ishinde 5,2 mln — balalar, 9,2 mln-eńbekke qabiletti jastaǵy eresekter jáne 1,5 mln — zeınetkerler. Bul degenimiz, eldiń árbir tórtinshi turǵyny (24%) kedeı degendi bildiredi.

Daǵdarys ásirese balalarǵa qatty áser etti. Esepke sáıkes, 2022/23 oqý jylynda kámeletke tolmaǵandardyń úshten biri (36%) kedeılik jaǵdaıynda boldy. Bul 2019/20 oqý jylymen salystyrǵanda bes paıyzǵa ósti.

Komıssııa kedeılikti qazirgi materıaldyq qajettilikterdi qanaǵattandyrý úshin resýrstardyń jetispeýshiligi retinde anyqtaıdy. Kedeıliktiń negizgi kórsetkishi adamnyń qazirgi ýaqytta onyń tikeleı qajettilikterin jabý úshin jetkilikti materıaldyq resýrstary bar-joǵyn baǵalaýǵa baǵyttalǵan.

Esterińizge sala keteıik, biz buǵan deıin Ulybrıtanııa ekonomıkasy nóldik ósimge deıin baıaýlaǵanyn jazǵan bolatynbyz.

Kedeılik pen ashtyqqa qarsy kúres — Brazılııada ashylǵan «Úlken jıyrmalyq» G20 sammıtiniń mańyzdy máseleleriniń biri.