Brıtan radıosy qatelesip korol III Charlzdiń qaıtys bolǵanyn habarlap jiberdi
ASTANA. KAZINFORM — Ulybrıtanııadaǵy Radio Caroline radıostantsııasy korol III Charlzdiń qaıtys bolǵany týraly jańsaq habar taratqannan keıin keshirim surady. Bul týraly DW jazdy.
Oqıǵa brıtan monarhy qaıtys bolǵan jaǵdaıda radıostantsııalar qoldanatyn «Monarh» dep atalatyn hattamanyń kezdeısoq iske qosylýynan bolǵan.
Stantsııa jetekshisi Pıter Mýr Facebook jelisinde:
— «Monarh» hattamasy seısenbi kúni tústen keıin kezdeısoq iske qosylyp, Mártebeli Koroldiń qaıtys bolǵany týraly qate habar taratyldy, — dep jazdy.
Mýrdyń aıtýynsha, aqaýǵa negizgi stýdııada bolǵan kompıýterlik qate sebep bolǵan. Oqıǵadan keıin Radio Caroline aldymen tikeleı efırde keshirim surap, keıin áleýmettik jelilerde korol men tyńdarmandarǵa taǵy da resmı túrde keshirim jarııalady.
Qate habar aıtylǵan efır jazbasy kóp uzamaı radıostantsııa saıtynan alynyp tastaldy.
1964 jyly qurylǵan radıostantsııa buǵan deıin koroldik otbasy músheleriniń resmı úndeýlerin efırge shyǵarǵanyn jáne muny bolashaqta da jalǵastyrýǵa úmitti ekenin atap ótti.
Oqıǵa kezinde III Charlz Soltústik Irlandııada saparda bolǵan. Ol onkologııalyq aýrýǵa baılanysty em qabyldaýdy jalǵastyryp jatyr.
Aıta keteıik, bıylǵy sáýir aıynda Charlz III AQSh-qa 2007 jyldan beri alǵash ret memlekettik saparmen barǵanyn jazdyq.
Al naýryz aıynda korol Charlz III qaterli isiktiń janama áserine baılanysty aýrýhanaǵa túsken edi.
