Biryńǵaı memlekettik satyp alý platformasyna 120 myń qazaqstandyq jetkizýshi tirkelgen
ASTANA. KAZINFORM – 2025 jyly Qazaqstandaǵy memlekettik satyp alýlardyń jalpy kólemi 8,1 trln teńgege jetti. Biryńǵaı tsıfrlyq platformada naryqtyń rekordtyq sany – shamamen 18 myń memlekettik tapsyrys berýshi jáne 120 myń belsendi jetkizýshi tirkelgen. Bul týraly qarjy vıtse-mınıstri Dáýren Keńbeıil málimdedi.
Memleket basshysy Qasym-Jomart Toqaevtyń tapsyrmasymen 2025 jylǵy 1 qańtardan bastap kúshine engen «Memlekettik satyp alý týraly» zań júıeni túbegeıli reformalady. Negizgi jetistik – satyp alý rásimderiniń merzimin qysqartý jáne tolyq avtomattandyrý esebinen ashyqtyqty arttyrý. Mańyzdy jańashyldyqtardyń biri – reıtıngtik-baldyq júıe bolyp otyr. Osy júıe men jasandy ıntellekt elementterin qoldaný nátıjesinde konkýrs jeńimpazy endi nebári 5 kún ishinde anyqtalady. Buryn standartty konkýrs keminde 60 kúnge sozylatyn.
Otandyq óndirýshilermen jasalatyn sharttar segmenti de aıtarlyqtaı ósim kórsetti. Qazaqstandyq bıznes úshin birqatar mańyzdy preferentsııalar engizildi: kelisimshart somasynyń 50 paıyzyna deıin mindetti avans, qarjylyq kepildikterden bosatý jáne aıyppul sanktsııalary boıynsha jeńildikti sharttar. Nátıjesinde jergilikti taýar óndirýshilermen jasalǵan kelisimsharttar kólemi 23 paıyzǵa artyp, 456 mlrd teńgege jetti.
Sonymen qatar, reforma qatysýshylarǵa qoıylatyn talaptardy qatańdatyp, adal emes jetkizýshiler úshin senimdi tosqaýyl qalyptastyrdy. Júıede burynǵy zańbuzýshylyqtar týraly aqparat avtomatty túrde eskeriledi. Bul iskerlik bedel men sapa basty ólshemge aınalatyn jańa mádenıetti qalyptastyrýǵa yqpal etedi.
– 2026 jylǵa birqatar jańa mindet qoıylyp otyr. Birinshiden, reıtıngtik-baldyq júıeni qoldaný aıasyn keńeıtip, ony jetkizýshini tańdaýdyń negizgi tetigine aınaldyramyz. Ekinshiden, búkil memlekettik sektor men kvazımemlekettik kompanııalar úshin erejelerdi birizdendirýdi aıaqtaý qajet. Sondaı-aq satyp alý rásimderine baqylaýdy kúsheıtý mindeti tur, – dep túıindedi qarjy vıtse-mınıstri.
Aıta keteıik, buǵan deıin memlekettik satyp alýda alaıaqtyq shemalarǵa qalaı tosqaýyl qoıylatyny habarlandy.